Өнөөдөр Ардчилсан намаас Аймаг, нийслэл, сум, дүүргийн Иргэдийн төлөөлөгчдийн хурлын сонгуулийг шударга зохион байгуулж явуулахтай холбоотой асуудлаар ҮАБЗ-д хандан албан бичиг хүргүүллээ. Үүнтэй холбоотойгоор тус намаас мэдээлэл хийв. 

Энэ үеэр УИХ-ын дэд дарга С.Одонтуяа "Орон нутгийн сонгуулийн явцад удаа дараа хууль бус ноцтой үйлдэл илэрсэн талаарх мэдээллүүд АН-д олноор ирж байна. Өчигдөр сошил орчинд ноцтой бичлэг тавигдсаныг та бүхэн харсан. Монгол Ардын намын нэр дэвшигч Сэвжидмаа, Гангамөрөн нарын сонгуулийн санал хураах хар машиныг хэрхэн хакердах, үйлчилгээ авахаар ярьж байгаа маш ноцтой бичлэг тарсан. Мөн хэд хэдэн дүүрэг дээр сонгогчдын саналыг авах зорилгоор мөнгө тарааж байгаа бичлэгүүд тарсан. Энэ зүйлс нь өөрөө Үндсэн хуулийн хоёр дахь хэсэгт заасан "Төрийн эрх мэдлийг хууль бусаар авахаар завдаж байна" гэсэн зүйл заалттай нийцэж байна. Түүнчлэн эрүүгийн хуулинд заасан олон зүйл заалтад хамаарч байгаа. 

Бид үндэсний аюулгүй байдал, иргэдийн амгалан тайван амьдрахад ноцтой занал хийлэл үүсч байна.

Сошилд тараад буй бичлэг дээр хар машины сервер нь гадаадад байдаг талаар хэлсэн. Та бүхэн санаж байвал 2016 онд Доржзодвын задалсан бичлэг дээр мөн "гадаадын мэдээлэл технологийн туслалцаа авна" гэж гардаг. Тэгэхээр энэ бүхэн давтагдаж байна.

Тухайн бичлэг дээр "Өнгөрсөн хаврын сонгууль дээр үр дүнгээ маш сайн өгсөн. Бид санал тоолох машин болон гар тооллоготой мөргөж, яг таруулдаг талаар дэлгэрэнгүй хүүрнэсэн" гэж гарч байгаа. 

Энэ бүхнээс харахад "төрийн эрхийг хууль бусаар авах оролдлого мөн" гэж АН-аас үзэж байна. Нэг намын дангаар ноёрхож байгаа энэ үед тагнуулын байгууллага нь хүртэл хүчин мөхөсддөг юм байна. 

Сайхан тагнуулын байгууллагын 11 хүн ажлаасаа халагдсан нь том эргэлзээ төрүүлж байна" гэлээ. 

Нийслэлийн Ардчилсан намын дарга Д.Пүрэвдаваа ҮАБЗ-д шаардлага хүргүүлсэн талаар мэдээлэв. 

Тэрээр "Бид таван заалттай шаардлага хүргүүлж байгаа. 

1. Уг хэргийг Монгол Улсын Үндэсний аюулгүй байдлын зөвлөлийн хурлаар нэн яаралтай хэлэлцэх,
2. УИХ-ын 2020 оны 4 дүгээр сарын 16-ны өдрийн 24 тоот тогтоолоор баталсан “Аймаг, нийслэл, сум, дүүргийн Иргэдийн төлөөлөгчдийн хурлын 2020 оны ээлжит сонгуульд техник хэрэгсэл хэрэглэх тухай тогтоолд яаралтай өөрчлөлт оруулж санал тоолох дүн гаргах үйл ажиллагаанд “New Image Cast” төхөөрөмж хэрэглэхийг болиулах,
3. Үүнтэй холбоотойгоор орон нутгийн сонгуулийн саналыг гараар тоолох, хар машин хэрэглэхгүй байх;
4. Саналаа өгсөн сонгогчдын хуруунд бэхэн тэмдэглэгээ заавал хийдэг болох,
5. 2020 оны 4 дүгээр сарын 16-ны өдрийн 24 тогтоолын биелэлтийг шалгах үүрэг бүхий Хянан шалгах түр хороо байгуулах шаардлагыг хүргүүлж байна. 

Хэрвээ ҮАБЗ шаардлагад нэн яаралтай хариу ирүүлэхгүй бол бид олон улсын байгууллагад хандах болно" гэлээ. 

Шаардлагыг Монгол Улсын Үндэсний аюулгүй байдлын зөвлөлийн гишүүн УИХ-ын дарга Г.Занданшатар, Ерөнхий сайд У.Хүрэлсүх нарт мөн илгээсэн байна.