Бизнесийн төлөөллийн байгууллага МҮХАҮТ Засгийн газар хамтран жил бүр ТОП-100 ААН-ийг эрэмблэн зарладаг уламжлал ёсоор маргааш буюу энэ лхагва гаригт үйл ажиллагааг зохион байгуулна. 

Энэ жил "COVID-19"-ийн нөхцөл байдлаас шалтгаалж ТОП-100 ААН-үүдийг өргөмжлөх, эрэмбийг зарлах үйл ажиллагааг цахимаар зохион байгуулж, "Блүүмберг" телевизээр шууд дамжуулах талаар МҮХАҮТ-аас мэдээллээ. 

2019 оны ТОП 100 ААН-ийн борлуулалтын орлогын хэмжээ өмнөх онтой харьцуулахад 3.4 их наядаар өсөж, 34.3 их ная төгрөгт хүрчээ. Энэ нь ДНБ-ийн 93 хувь, төлсөн татварын хэмжээ өмнөх жилээс 54 хувиар өсөж, 6.3 их наяд төгрөгт хүрсэн нь татварын нийт орлогын 65 хувьд хүрсэн үзүүлэлттэй байна.  

2018 онд ТОП 100 ААН-ийн төлсөн татвар нь татварын нийт орлогын 50 хувийг эзэлж байсан бол 2019 онд энэ үзүүлэлт 15 хувиар өсжээ. Үүнд ажиллагсадын тоо 6 мянгаар нэмэгдэж 89 мянгад хүрсэн нь нийт ажлын байрны 8 хувьтай тэнцэж байна. Мөн нийгмийн даатгалын шимтгэлийн орлогын 27 хувийг бүрдүүлжээ.

ТОП ААН-үүдийг тухайн жилийн орлого, улсын төсөвт оруулсан татвар, нийгмийн даатгал төлсөн, ашиг, хөрөнгийн хэмжээ болон ажилтнуудын тоо гэсэн үндсэн 5 үзүүлэлтээр дүгнэн Сангийн яам, ГЕГ, Татварын ерөнхий газар, НДЕГ, Улсын бүртгэлийн газар, Статистикийн үндэсний хороо болон МҮХАҮТ-ын төлөөллүүд хамтарсан ажлын хэсгийн албан ёсны мэдээ, тайлан, тоон үзүүлэлтэд тулгуурлан эрэмбэлэн зарладаг юм.