Эрүүл мэндийн яамнаас коронавируст цар тахлын нөхцөл байдлын талаар ээлжит мэдээллээ хийлээ. Монгол улсад долоо дахь удаагаа эрсдэлийн үнэлгээ хийхэд халдвар тархах эрсдэл дахин МАШ ӨНДӨР гэж гарчээ.
Эрүүл мэндийн яамны Нийгмийн эрүүл мэндийн хэлтсийн дарга Д.Нарангэрэл: "Дэлхийн 213 оронд коронавирусийн улмаас 2.330.967 өвчилж, 160765 хүн нас барж, 596537 хүн эдгэрч эмнэлгээс гарсан байна. Дэлхий даяар 1.5 сая хүн эмнэлэгт хэвтэн эмчлүүлж байна.
Өвчлөлийн хувьд АНУ, Итали, Иран, Испани, Герман, Франц, Их Британи, Турк улсуудад голомтлон тархаж байна.
ОХУ-д сүүлийн 24 цагт 1785 тохиолдол бүртгэгдэж, нийт өвчилсөн хүний тоо 36793, нас барсан 113 тохиолдол байна. Өвчлөлийн гол цөм нь Москва хот болоод байна. Москва хотод 2649 шинэ тохиолдол бүртгэгдсэн. Үүний 50 гаруй хувь нь 49 хүртэл насны хүмүүс байна. Үүний улмаас тус хотд хөл хорионы дэглэмийг чангатгаж дөрөвдүгээр сарын 22-ноос эхлээд зөвшөөрөлгүй бол метронд суулгахгүй байхаар болжээ. Харин автомашины хөдөлгөөнийг камераар хянахаар болсон байна.
Эрхүү мужид шинээр 57 тохиолдол бүртгэгдсэн. Эрхүү мужийн эмнэлэгт 15 хүртэл насны 10 хүүхэд байгаагийн хамгийн бага нь долоон сартай хүүхэд байна. Энэ нь бага насны хүүхэд өвчилсөн дөрөв дэх тохиолдол гэж үзсэн байна.
Эрхүү, Буриадад яагаад бага насны хүүхэд өвчлөөд байгааг цаг агаар дулаарч байгаагаас эцэг эхчүүд хүүхдээ гадуур дагуулж явж, балархай хэлбэрийн нян тээгч буюу шинж тэмдэггүй нян тээгчээс өвчлөл авч байна гэж үзэж байгаа. ОХУ-д илэрч байгаа тохиолдын 50 хувь нь балархай тээгч байна.
ОХУ-ын ерөнхийлөгч Путин нөхцөл байдлын улмаас зарлиг гаргаж визийн хугацаа дуусч байгаа гадаад иргэдийн визийн зургаадугаар сарын 15-н хүртэл сунгах шийдвэр гаргасан.
Манай улсын хувьд ажиглалтад 1227 байна. Өчигдрийн хувьд 226 гарсан ажиглалтаас гарч, гэрийн ажиглалтад шилжсэн. Нийт ажиглалтын байруудад дөрвөн их эмч, 27 дадлагжигч эмч ажиллаж байна.
Хөрш орнуудад өвчлөл их байгаа, манай олон аймагтай хилэлдэг тул иргэдийг сайтар сонор сэрэмжтэй байж, ЭМЯ-наас өгч буй зөвлөмжийг биелүүлэн, гараа сайтар угаах, маскаа зүүх, бага насны хүүхдээ дагуулж явахгүй, гадаа тоглуулахгүй байхыг хүсье" гэв.