Улсын онцгой комиссын Шуурхай штабаас өнөөдөр мэдээлэл хийлээ. Мэдээллийн үеэр Шадар сайд, УОК-ын дарга Ө.Энхтүвшин оролцсон бөгөөд цаг үеийн нөхцөл байдлын талаар мэдээлэл өгөв. 

УОК-ын дарга Ө.Энхтүвшин: Шинэ коронавирусийн тархалтын байдал улам хүнд болж байна. АНУ-д халдвар авсан хүний тоо 244877 болсон. Нэг өдрийн дотор 29 мянга гаруй хүн өвдөж байна. Ийм тохиолдол өмнө нь Хятад, Солонгосд ч болоогүй. 

Эх орондоо ирье гэсэн хүний тоо 20-иодхон хоногийн өмнө 3000 орчим байсан бол өнөөдөр 6000 гаруй болоод байна. Цаашдаа ч нэмэгдэх хандлагатай болчихсон байна. Нийт 47 орноос сонгол улсын иргэд хандсан. Эдгээр орнуудад байдал хүнд байгаа учраас манай иргэдийн байдал амаргүй байна. Ажилгүй, орлогогүй болохоос өмнө арьс өнгөөр ялгаварлах үзэгдэл нэлээд их ажиглагдах болсон. Гадагшаа гарч, дэлгүүр орж, хүүхдээ салхилуулах боломжгүй болсон учраас эх орондоо ирье гэж байгаа юм. 

Гэвч бид нислэгийн хэлэлцээртэй орнууд руу л нислэг хийнэ. АНУ, Канад зэрэг улс руу нислэг үйлдэх боломжгүй. 

Дараагийн тусгай нислэг дөрөвдүгээр сарын 8-нд БНСУ-руу хийгдэнэ. Тусгай нислэгийг ойрхон хийх боломжгүй. Нисэх баг иргэдтэй адил тусгаарлалтад орно. Олон баг байхгүй учраас ойр ойрхон нислэг хийх боломжгүй. 

УОК-оос гадаад орноос ирэх иргэдэд коронавирусийн шинжилгээ хийлгэсэн байх ёстой гэсэн шаардлага тавьж байгаа. Энэ шаардлага БНСУ-д байгаа иргэдийн хувьд хангагдаж байна. Өчигдөр тус улсаас ирсэн 270 орчим хүний 18 нь л шинжилгээ өгч чадаагүй байсан. Бусад орны тухайд шинжилгээ хийлгэх шаардлага хангагдахгүй байна.

Тухайлбал, Япон улсын тал өвчний шинж тэмдэг илэрсэн хүмүүст л шинжилгээ хийнэ гэж байгаа. Ийм тохиолдолд бид оношлогоо явуулж, иргэдээ шинжилгээнд хамруулъя гэдэг хүсэлт тавьсан ч тус улсын зөвшөөрөлгүй оношлогооны хэрэгсэл нэвтрүүлэхгүй гэсэн хариу өгсөн. Өнөөдөр Токиогоос ирж байгаа 266 зорчигч оношлогоо хийлгэж чадаагүй. Тиймээс энэ бол маш өндөр эрсдэлтэй нислэг ирж байна. Түүн дотроо 56 орчим иргэн нь АНУ болон Европын орнуудаас дамжин ирж байна.

Байрлуулах байрнуудыг зохицуулсан. Гэр бүлээрээ болон зайлшгүй асаргаа шаардлагатайгаас бусад бүх зорчигч нэг нэгээрээ байрлана. Бүх зүйл хяналтад байгаа" гэв. 

Мөн тэрээр үргэлжлүүлэн өөрийн хүүг тусгай үүргийн онгоцоор ирсэн талаар тайлбар өглөө. 

Тэрээр "Миний хүүхэд түрүүчийн ирсэн 1,000 хүний дотор ирсэн. Герман, Москвагийн онгоцоор ирсэн. АНУ-д сурдаг хүүхэд. Тэр онгоцоор 231 зорчигч ирсэн. 20 орчим зорчигч дутуу ирсэн. Тийм учраас ямар нэгэн хүний урдуур дайрсан асуудал байхгүй. Өөрөө билетээ бичүүлээд тойрсоор ирсэн. 

Хэн ч гэсэн хүрээд ирлээ гэхэд миний хүүхэд учраас, даргын хүүхэд учраас цаашаа бай гэж би л лав хэлж чадахгүй. Хамгийн гол нь төлбөрөө төлсөн, хүний очер дайрахгүй, ар өврийн хаалгаар онгоцонд суух ёсгүй" гэсэн юм.