Өнөөдөр Эрүүл мэндийн яамнаас шинэ төрлийн коронавирусийн халдварын нөхцөл байдлын талаар мэдээлэл хийсэн билээ.

Энэ үеэр ХӨСҮТ-ийн ерөнхий захирал Д.Нямхүү "Монгол улсад коронавирусийн 11 дэх тохиолдол бүртгэгдсэн" талаар мэдээлэв. 

Мөн Эрүүл мэндийн яамны хэлтсийн дарга Д.Нарангэрэл дэлхийн нөхцөл байдлын талаарх сүүлийн үеийн мэдээллийг хүргэсэн юм. Коронавирусийн халдварын тархаль нэмэгдэж шинээр дөрвөн оронд халдвар бүртгэгдсэн бөгөөд нийт дэлхийн 200 оронд халдвар тархаад байна. 

Мөн манай улс өчигдөр тав дахь удаагийн эрсдлийн үнэлгээг хийж, халдвар тархах эрсдэл МАШ ӨНДӨР гэсэн үнэлгээ гарчээ. 

Тэгвэл дэлхийн улс орнуудад коронавирусийн халдварын тархалтыг хязгаарлахын тулд хөл хорио тогтоох хатуу арга хэмжээнүүдийг хэрэгжүүлж байна. Ингэснээр халдварын тохиолдлуудыг илрүүлэх, тусгаарлах, шинжилгээ авах, эмчлэх, ойрын хавьтлыг тогтоох бололцоо хурдан бүрдэж байгаа талаар Дэлхийн эрүүл мэндийн байгууллага мэдээлжээ.

Харин тус байгууллагын захирал Тедрос Адханом Гебрейесус: "Дан ганц хөл хорио тогтоосноор цар тахлыг зогсоож хүчрэхгүй. Халдварын тархалтыг зогсоож, хүмүүсийн амь насыг аврахын тулд хөл хорио тогтоосон хугацаандаа вирус руу довтлохыг бид уриалж байна” гэжээ. 

Тэрээр мөн улс орнуудын авч хэрэгжүүлэх хэрэгтэй зургаан алхмыг нэрлэжээ. 

Үүнд:

• Эмнэлгийн байгууллагын ажиллах хүчийг өргөжүүлж, сургаж, байршуулах,

• Халдвар авсан байх магадлалтай бүх сэжигтэй тохиолдлыг илрүүлэх системийг хэрэгжүүлэх,

• Шинжилгээний оношлуурын үйлдвэрлэл, хүчин чадал болон хүртээмжтэй байдлыг нэмэгдүүлэх,

• Өвчтөнүүдийг эмчлэх, тусгаарлахад ашиглах байгууламжуудыг тодорхойлж, тоноглох,

• Ойрын хавьтлуудыг тусгаарлах тодорхой төлөвлөгөө боловсруулах,

• Эрүүл мэндийн салбар дангаараа хийх боломжгүй ажил тул салбар хоорондын хамтын ажиллагааг сайжруулах болон Засгийн газар тархалтыг хумьж, хяналтад авахад дахин анхаарал хандуулахыг зөвлөжээ.

Энэхүү цар тахлын эсрэг хариу арга хэмжээг цаг алдалгүй авч чадвал тархалтыг хязгаарлах боломжтойг зарим улс орны жишээ харуулж байгаа билээ.

Халдвар авсан нэг хүн дараагийн хүнд халдвар тараах хугацааг дунджаар 4.8 хоног гэж тогтоосон бөгөөд өвчний нууц үе дунджаар зургаан хоног аж.