БСШУС-ын сайд Ё.Баатарбилэг өнгөрөгч баасан гаригт Монгол-Япон улсын хамтарсан Сургалтын эмнэлгийн нөхцөл байдалтай танилцсан юм. Тус эмнэлгийг Засгийн газрын хуралдаанаар БСШУСЯ-ны харьяа болгон шилжүүлсэн билээ.

Сургалтын эмнэлэг бүрэн үйл ажиллагаа явуулахад нийт 14.3 тэрбум төгрөгийн санхүүжилт шаардлагатай байгаа бөгөөд гуравдугаар сард хэрэглэх эм, эмнэлгийн хэрэгслийн зардлыг нэмж тооцоход 800 гаруй сая төгрөгийн өр үүсээд буй юм.

Энэ талаар сайд Ё.Баатарбилэг хэлэхдээ “Эмнэлгийн үйл ажиллагаа жигд хэвийн явагдана. ЭМЯ, Сангийн яам, БСШУСЯ хамтран тулгарч буй асуудлыг шийднэ. Нэгдүгээрт, хууль эрх зүйн орчны асуудал байгаа учир Эмнэлгийн тусламж үйлчилгээний тухай хуульд өөрчлөлт оруулна.

Хоёрдугаарт, эмнэлгийг АШУҮИС-ийн дэргэдэх Сургалтын эмнэлэг гэдэг чиг үүргээр шинэчлэн байгуулна. Энэ эмнэлгээс Монголын томоохон эмнэлгүүдэд ажиллах сайн боловсон хүчин гарах учиртай. Дэлхийн банкны санхүүжилтээр 10 гаруй тэрбум төгрөгийн тоног төхөөрөмж авахаар болсон. Сангийн яам хэлэлцээр хийж байгаа.

Дөрөв, тавдугаар сард худалдан авах ажиллагаа зохион байгуулна. Тендер зарлаж удаахгүй. Та бүхний өгсөн жагсаалтад буй тоног төхөөрөмжүүдийг авна. 1.2 тэрбум төгрөгийн өр бий гэсэн. Эхний ээлжийн өрийг дарах 800 сая төгрөгийг Сангийн яам ирэх долоо хоногт хуваарьт өөрчлөлт оруулж шийднэ. Эмнэлэг 2.3 тэрбум төгрөгийн тоног төхөөрөмж худалдан авахаар төсөвт суусан.

Худалдан авах эрх нь эмнэлэгт шилжсэн тул Дэлхийн банкны тоног төхөөрөмжтэй давхардуулахгүйгээр тоног төхөөрөмжөө авах хэрэгтэй. Нэн тэргүүнд шаардлагатай байгаа үйл ажиллагааны нэг тэрбум орчим төгрөгийг шийдвэрлэнэ. Цаашид шаардагдах үйл ажиллагааны зардлыг Сангийн яам, ЭМЯ-тай хамтран шийднэ” гэсэн юм. 

Эмнэлэг бүрэн хүчин чадлаараа ажиллавал жилд 150 мянга орчим хүнд тусламж үйлчилгээ үзүүлж, гадаадын эрүүл мэндийн салбар хөгжсөн улсад хийдэг нарийн мэс заслуудыг хийх боломжтой юм. Анх 2019 онд 514 ажилтантай байсан уг сургалтын эмнэлэгт энэ жил дахин 14 эмч, 52 сувилагч нэмж ажиллуулах хэрэгтэй аж. 

Энэ өдөр мөн Япон улсаас Монгол улсад суугаа онц бөгөөд Бүрэн эрхт элчин сайд Кобаяаши Хироюки хамт Сургалтын эмнэлгийн нөхцөл байдалтай танилцсан юм. Тэрээр “Өнөөдөр анх удаа энэ эмнэлэгтэй танилцлаа. Би эмч, эмнэлэг түүний ач холбогдлыг сайн мэддэг учраас Монголын ард түмэнд энэ сайхан эмнэлгийн өндөр түвшний эмчилгээ хүрээсэй гэж хүсэж байна. Би олон эмнэлэгт очиж байсан ч энэ эмнэлгийн ариун цэвэр, тоног төхөөрөмж, байшингийн бүтэц зэрэг нь их сайн юм. Тиймээс цаашид эмнэлгийг хэвийн ажиллана гэж найдаж байна” гэсэн юм.