Японы Засгийн газрын тусламжаар байгуулсан АШУҮИС-ийн дэргэдэх Монгол-Японы сургалтын эмнэлгийг хувьчлах гэж байна, MCS компанид өгөх гэж байна гэх шуугиан сүүлийн хэдэн сар газар авч, салбарын мэргэжилтнүүдийг талцуулаад байсан билээ. Улмаар өмнө АШУҮИС-ийн (Их сургууль нь БСШУСЯ-ны харьяа) харьяанд байсан сургалтын эмнэлгийг ЭМЯ-ны давхар харьяалтай болгосон нь салбар хоорондын маргаан болгож хувиргасан юм. 

Тэгвэл Засгийн газрын өнөөдрийн хуралдаанаар “Монгол-Япон сургалтын эмнэлэг” буюу АШУҮИС-ийн Сургалтын эмнэлгийн асуудлыг БСШУСЯ-ны харьяанд шилжүүлжээ. Хуралдаанаас гарсан шийдвэрийг БСШУС-ын сайд Ё.Баатарбилэг танилцууллаа. 

Ё.Баатарбилэг: "Монгол-Японы сургалтын эмнэлгийн үйл ажиллагааны санхүүжилт, техник тоног төхөөрөмжийн асуудлыг цогцоор нь шийдлээ.  Эмнэлгийг хувьчлах асуудал байхгүй. Өнөөдрөөс БСШУСЯ-ны харьяанд шилжиж ирж байна. Цаашид үйл ажиллагаа нь хэвийн үргэлжилнэ. Эмнэлэгт шаардлагатай байгаа зарим нэг тоног төхөөрөмжийг Дэлхийн банкны санхүүжилтээр шийднэ. Өөр ямар нэгэн хүндрэлтэй асуудал гарахгүй гэж үзэж байна. Цаашид бид үйл ажиллагааг нь хэвийн явуулах асуудлыг хариуцна. 

Өнөөдрийн байдлаар тус эмнэлэгт дүрс оношилгоо, амбулатори, уламжлалт, лаборатори гэсэн хэсгүүд ажиллаж байгаа. Үйл ажиллагааг нь хэвийн үргэлжлүүлэхэд шаардлагатай 14 тэрбум төгрөгийг бид Дэлхийн банкнаас шийдсэн" гэв. 

Үүгээр Монгол-Япон сургалтын эмнэлгийг тойрсон салбар хоорондын маргаан дуусч, АШУҮИС-ийн Сургалтын эмнэлэг БСШУСЯ-ны харьяанд үйл ажиллагаагаа үргэлжлэхээр болов.