“Эрдэнэс Тавантолгой” компанийн хувьцаа эзэмшиг иргэдэд ногдол ашиг тараах болсон талаар “Эрдэнэс Тавантолгой” компанийн Гүйцэтгэх захирал Б.Ганхуяг, Уул уурхай, хүнд үйлдвэрийн сайд Д.Сумьяабазар нар мэдээллээ. Тус компанйн  ТУЗ-ийн хуралдаанаас хувьцаа эзэмшигчдэд ногдол ашиг тараах шийдвэрийг гаргасан байна. Тус компани 10 гаруй жилийн хугацаанд үйл ажиллагаа явуулахдаа ногдол ашиг хуваарилж байсан удаагүй. 2018 онд тус компани 800 гаруй тэрбум төгрөгийн ашигтай ажиллаж, 2019 оны эхээр компанийн ТУЗ анх удаа хувьцаа эзэмшигчдэд ноогдол ашиг тараах шийдвэр гаргасан ч Засгийн газар уг мөнгийг төмөр замын бүтээн байгуулалтад зарцуулахаар шийдвэрлэсэн билээ.  

Үүний дараа буюу өнгөрөгч онд УИХ-ын өргөдлийн байнгын хорооноос ноогдол ашиг хуваарилах асуудлаар нээлттэй хэлэлцүүлэг зохион байгуулж, компанийн 2019 оны цэвэр ашгаас ноогдол ашиг хуваарилах үүргийг Засгийн газарт өгсөн байдаг. 

Д.Сумьяабазар: Шинээр төрсөн 600 мянган хүүхдэд хувьцааны ноогдол ашиг хуваарилах боломжтой

Компани өнгөрөгч 2019 онд нэг тэрбум 30 сая ам.долларын борлуулалтын орлоготой ажилласан. Тиймээс нэгж хувьцааны ногдол ашгийг 90 төгрөгөөр тооцож, 1,072 ширхэг хувьцаанд 96 мянган төгрөг хуваарилахаар шийдвэрлэсэн байна. Цаашдаа компанийн орлого нэмэгдсэн тохиолдолд ногдол ашиг ч нэмэгдэнэ гэдгийг Уул уурхайн сайд Д.Сумьяабазар хэлэв.

Мөн тэрээр 2014 оны дөрөвдүгээр сарын 11-нээс хойш шинээр төрсөн 600 мянга гаруй хүүхдэд хувьцаа эзэмшүүлэх, ногдол ашиг тараах бүрэн боломж бий гэв. Энэ асуудлыг Засгийн газарт танилцуулж, тухай бүрт нь мэдээлэл өгөх гэнэ.

Б.Ганхуяг: 580 мянган иргэн хувьцааны бүртгэлээ хийлгээгүй байна 

"Эрдэнэс Тавантолгой” компанийн Гүйцэтгэх захирал Б.Ганхуяг: 

-"Эрдэнэс Тавантолгой" ХК 2019 онд нэг тэрбум 30 сая ам.долларын борлуулалтын орлого олсон. Нэг их наяд төгрөгийн цэвэр ашигтай ажилласан. Улсын төсөвт 670 тэрбум төгрөг төвлөрүүлжээ. Компани 2016 оноос хойш ашигтай ажиллаж, их хэмжээний гадаад дотоод төлбөрийг барагдууллаа. 

Өнөөдрийн байдлаар Өнөөдрийн байдлаар 580 мянган иргэн хувьцааны бүртгэлээ хийлгээгүй байна. Голдуу хүүхдүүд, гадаадад амьдардаг иргэд бүртгүүлээгүй байна. Эдгээр иргэдийн бүртгэлийг хувьцаа эзэмшигчдийн хурал хүртэл явуулна. Ногдол ашгаа авахын тулд иргэд бүртгүүлэх ёстой. Бид хувьцаа эзэмшигчдийн хурлыг дөрөвдүгээр сарын 17-ны үед төлөвлөж байгаа. Тус хуралд өнөөдрийн ТУЗ-ийн хурлын шийдвэрийг танилцуулснаар ногдол ашиг хуваарилах эрх нээгдэнэ. Ногдол ашгийг тавдугаар сараас олгож эхэлнэ. Ногдол ашиг авснаар таны эзэмшиж буй хувьцааны тоо буурахгүй гэв.