Эрүүл мэндийн яамнаас шинэ коронавирусийн халдварын нөхцөл байдлын талаар хэрэгжүүлж буй ажлуудын талаар ээлжит мэдээллээ өглөө.

ХХААХҮЯ-ны Хүнсний үйлдвэрийн хөгжлийн бодлогын зохицуулалтын газрын дарга Т.Гантогтох: "Монгол улсын ерөнхийлөгчийн зарлиг, Засгийн газраас гарсан тогтоол, шийдвэрийн дагуу ХХААХҮЯ өндөржүүлсэн бэлэн байдалд ажиллаж байна. Хил хааснаар бараа бүтээгдэхүүний импортыг хориглоогүй. Харин урд хөршид гарсан шувууны ханиадны улмаас шувууны мах, махан бүтээгдэхүүнд л түр хязгаарлалт хийсэн. 

Гол нэрийн бараа бүтээгдэхүүний нөөц хангалттай байгаа тул хомсдол үүсэхгүй. Тиймээс иргэд хүнсээ бөөнөөр нь худалдан авч нөөцлөх шаардлагагүй" гэлээ. 

Мөн тэрээр шим тэжээлтэй хоол хүнс хэрэглэж, тэр дундаа адууны мах, аарц хэрэглэж дархлаагаа дэмжихийг иргэдэд зөвлөлөө.

Мөн энэ үеэр ГХЯ-ны Консулын газрын захирал Л.Мөнхтүшиг Засгийн газрын гэнэтийн шийдвэрээс шалтгаалан БНХАУ-д байгаа нутаг буцах хүсэлтэй иргэдийг хэрхэн хүлээн авах талаар мэдээлэл хийв. 

Тэрээр "БНХАУ-д байгаа Монгол Улсын иргэдийг авчрах асуудлыг ГХЯ-нд хариуцуулсан. Тиймээс ЭСЯ, Консулын газруудаар дамжуулан иргэдээ дахин бүртгэлжүүлж байна. 400 орчим Монгол иргэд Хятад улсад байгаа гэсэн мэдээлэл байна.  

Эдгээр иргэд маань эх орондоо ирэх хүсэлтээ гаргавал ЭСЯ, Консулын газруудаар дамжуулаад зохион байгуулалттайгаар авчирна. Үүнтэй холбоотой нарийвчилсан зохион байгуулалтуудыг яг одоо хийж байна.

Мөн өнөөдрийн байдлаар Эрээн болон Хөх хот орчимд эх орондоо буцахаар төлөвлөж байсан, галт тэрэгний тасалбар захиалсан, шууд шийдвэрт өртсөн 60 орчим иргэдийг эхний ээлжинд авчрахаар ажиллаж байна.

Түүнчлэн БНХАУ-аас ирэх монгол иргэдийг хилээр нэвтэрсэн даруйд 14 хоног тусгаарлах арга хэмжээг авна" гэлээ. 

Мөн өнөөдрийн ХӨСҮТ-д нийт найман хүн, Архангай аймагт нэг хүн тусгаарлагдан, хянагдаж, шинжилгээний хариуг хүлээж байгаа аж. Ухань хотоос ирсэн 31 оюутныг давтан шинжилгээнд хамруулсан бөгөөд шинэ төрлийн коронавирусийн халдвар илрээгүй тул маргааш гэрт нь гаргахаар болжээ. 

Уханиас ирсэн оюутнуудыг хоёр удааг лабораторийн шинжилгээнд хамруулсан, мөн өдөр бүр эмчийн хяналтад байхад ямар нэг зовуурь илрээгүй гэдгийг ХӨСҮТ-ийн захирал Д.Нямхүү мэдээлэв.