Монгол улсын Эрүүл мэндийн яамнаас дэлхийн зарим улс оронд бүртгэгдсэн шинэ төрлийн коронавирусийн талаарх цаг үeийн асуудлаар мэдээлэл хийлээ.

Өнөөдрийн байдлаар БНХАУ-ын эрүүл мэндийн хорооны албан ёсны мэдээллээр Ухань хотод анх гарсан шинэ төрлийн коронавирусийн халдвараар 571 хүн өвчилж, 97 хүний биеийн байдал хүнд, 17 хүн нас барсан байна. Одоогоор Хятадын 30-аад мужид халдварын тохиолдол бүртгэгдээд байгаа ба дөнгөж сая Манжуур хотод 2 тохиолдол бүртгэгдсэн тул манай улсын Авто тээврийн газраас тус чиглэлийн зорчигч тээврийн хаагаад байна. 

Шинэ төрлийн вирусын талаар ЭМЯ-ны Бодлого төлөвлөлтийн газрын дарга Б.Цогтбаатар: "ДЭМБ, ХӨСҮТ гэсэн мэргэжлийн байгууллагын үндэслэлтэй, албаны мэдээллийг цаашид өдөр бүр өгнө. Албаны мэдээлэлд тулгуурлахгүйгээр иргэд айж сандрах, түгших, буруу зөрүү мэдээлэл хуваалцах тохиолдол гарч байна. Тиймээс хэвлэл мэдээллийн байгууллагууд болон сошиал мэдээ хэрэглэгчид мэдээллээ түгээхдээ анхаарах хэрэгтэй. Манай улсад шинэ төрлийн коронавирусын халдварын тохиолдол бүртгэгдээгүй. Тиймээс ЭМЯ болон эрүүл мэндийн байгууллагууд нэгдүгээрт, эрсдэлийн үеийг тооцон, бүртгэгдсэн тохиолдолд яаралтай оношилж эмчлэх, эмнэлгийн тусламжийн чадавхийн бэлэн байдлыг ханган ажиллах, хоёрдугаарт, урьдчилан сэргийлж таслан зогсоож Монголд оруулж ирэхгүй байх нийгмийн эрүүл мэндийн урьдчилан сэргийлэх арга хэмжээг төлөвлөн ажиллаж байна" гэв.

Харин ЭМЯ-ны НЭМГ-ын дарга Т.Энхзаяа: "Шинэ төрлийн коронавирусээс урьдчилан сэргийлэх талаар арга хэмжээ авч, эрсдэлийн үнэлгээг тухай бүрт нь хийж байна. Улсын хэмжээнд томуу болон халдварын тандалт хийх зорилгоор ХӨСҮТ, Зоонозын шуурхай удирдлагын төвтэй хамтран ажиллаж байна. Мөн  ХХЕГ, ГХЯ, МХЕГ-тай хамтран ажиллаж иргэдэд сэрэмжлүүлэг өгч байгаа. Коронавирусээс урьдчилан сэргийлэх хамгийн энгийн арга бол хүн бүр гараа савандаж угаах, амны хаалт тогтмол хэрэглэх нь чухал. Иймд өнөөдрөөс эхлэн олон нийтийн газарт хүн бүр амны хаалт зүүхийг уриалж байна" гэлээ. 

Мөн өнөөдөр Эрээн-Улаанбаатарын автобусаар Замын-Үүд боомтоор Өвөрмонгол ээж охин хоёр халуурсан байдалтай сэжигтэй тохиолдол бүртгэгдсэн тул тусгаарлаж, шинжилгээ авч, нутаг буцаахаар болжээ. Тус автобусанд 17 хүн байсан ба тархвар судлалын асуумж авчээ. Шинжилгээний хариу маргааш гарах юм байна.

БНХАУ-тай хиллэдэг боомтууд болон Буянт-Ухаа дахь хилийн боомтод Мэргэжлийн хяналтын байгууллагаас өндөржүүлсэн хяналт тавьж, зорчигчдын биеийн халууныг хэмжин асуумж, тандалт хийн ажиллаж байна.