Өнөөдөр БНХАУ-ын Ухань хотод хөл хорио тогтоож, нийтийн тээврийг зогсоосноос гадна хотоос гарахыг хориглосон талаар мэдээлсэн билээ. Хүний амь насанд хүрэх аюултай коронавирусын тохиолдол дэлхийн улс орнуудад тарах аюултай байгаа тул тал бүрийн арга хэмжээ аван ажиллаж байгаа аж. 

Тэгвэл дөнгөж сая БНХАУ-ын Манжуур хотод коронавирусын 2 тохиолдол бүртгэгдсэн тул Дорнод аймгийн онцгой комиссын шийдвэрээр тус чиглэлд зорчигч тээвэрлэлтийн үйл ажиллагааг түр зогсоохоор болсныг Авто тээврийн үндэсний газраас мэдээллээ. Тиймээс та бүхнийг Манжуурын чиглэлд зорчихгүй байхыг анхааруулж байна. 

БНХАУ-ын Ухань хотод гарсан шинэ төрлийн коронавирусний халдвараар өнөөдрийн (2020.1.23) байдлаар, 580 гаруй хүн халдварлаж, 17 хүн нас барсан байна. 

Монгол Улсын Эрүүл мэндийн яамнаас Коронавирусний халдвараас сэргийлэх талаар зөвлөмж гаргасан байна. Үүнд:

1. Гараа сайтар савандаж угаах, халдваргүйжүүлэгч хэрэглэх;

2. Ханиах, найтаах үедээ ам хамраа таглах, амны алчуур хэрэглэх;

3. Мах, өндгийг гүйцэд болгож идэх;

4. Амьсгалын замын өвчний шинж тэмдэг илэрсэн хүнтэй ойр байхаас зайлсхийх;

5. Мал, тэжээвэр болон зэрлэг амьтантай хүрэлцэхгүй байх;

6. Шүүрхий мах, махан бүтээгдэхүүн идэхгүй байх;

7. Түүхий ус уухгүй байх;

8. Далайн гаралтай хүнсний бүтээгдэхүүнийг сайтар буцалгаж хэрэглэх;

9. Арьс, салстаа гэмтээхгүй байх;

10. Мал, амьтны зах, аж ахуйгаар орохгүй байх;

11. Халдварын эрсдэлтэй бүс нутагт аль болох зорчихгүй, зочин урихгүй байх;

12. Хүн ихээр цугларсан газарт аль болох очихгүй байх;

13. Зэрлэг амьтдын мах, эд эрхтэнг хүнсэнд хэрэглэхгүй байх;

14. Нус, цэрээ ил задгай хаяхгүй байх.