УИХ-ын Өргөдлийн байнгын хороо болон гишүүн Д.Мурат, А.Сүхбат нар өчигдөр агаарын бохирдлыг бууруулах хууль, тогтоомж хэрэгжилттэй танилцжээ.
Тэд сайжруулсан түлшний хангамж, хүрэлцээ болон утаа мэдрэгч суурилуулсан айл өрхүүдтэй танилцаж, нам даралт, уурын зуухнуудад тавьсан шүүлтүүр үр дүнтэй байгаа эсэхтэй танилцсан байна.
Нийслэлийн Агаар, орчны бохирдлын асуудал хариуцсан төслүүдийн удирдагч Д.Мөнхжаргалын мэдээлснээр Улаанбаатар хотын нийт 2,730 тонн сайжруулсан түлшийг тээвэрлэн цэгүүдэд түгээж байна. Баянзүрх, Сонгинохайрхан гэх томоохон дүүрэгт өдөрт 750-800 тонн шахмал түлшний түгээлт хийгддэг бол бусад дүүрэгт 150-400 тоннын түгээлт хийдэг. Мөн түүний хэлснээр сүүлийн үед шахмал түлш савлах ажилд иргэд оролцох хүсэлтэй болсон байна. Нэг шуудай шахмал түлшийг 300 төгрөгөөр савладаг аж.
"Үйлдвэрээс нийлүүлж байгаа түлш хүрэлцээтэй"
Чингэлтэй дүүргийн хувьд нэг хангамжийн, хоёр дундын баазтай бөгөөд борлуулалтын 46 цэг хэвийн үйл ажиллагаа явуулж байна. "Тавантолгой Түлш" компанийн "Дөлгөөн нуур-3" хангалтын бааз өдөрт 70-90 түлшийг борлуулалтын цэгүүд рүү хүргэдэг. Бааз дээр өдөрт хамгийн багадаа 30 хүн түлш савлах ажил хийж, хийснээрээ цалинждаг байна. Үйлдвэрээс нийлүүлж байгаа түлш хүрэлцээтэй гэв. Харин сайжруулсан шахмал түлшний шуудайг түлэх буюу шатаахад эргээд агаарын бохирдол үүсгэх тул "шуудайг дахин ашиглах тал дээр анхаарах хэрэгтэй” тухай УИХ-ын гишүүн А.Сүхбат хэлэв. Онцгой байдал болон мэргэжлийн хяналтын байгууллагаас шуудайг шатаахын оронд үнс, хогоо хий гэсэн чиглэлийг өгдөг ч хэрэгжихгүй байгаа юм байна.
Чингэлтэй дүүргийн 12 дугаар хорооны иргэн н.Цагаанчулуун “Би өөрөө цагдаагийн эргүүл хийдэг хүн. Өглөө оройдоо байнга эргүүлд гардаг. Улаанбаатар хотын утаа багассан. Сайжруулсан шахмал түлшнээс ямар ч утаа гардаггүй нь сайн хэрэг. Гэвч 21.00 цагаас хойш хот заримдаа утаатай болдог нь анзаарагдсан. Энэ үеэр зарим иргэд түүхий нүүрс түлээд байна гэх хардлагыг төрүүлж байна.
"Угаарын хий мэдрэгчийг өрөө тус бүрт байрлуулах хэрэгтэй"
Нийслэлийн Агаар, орчны бохирдлын асуудал хариуцсан төслүүдийн удирдагч Д.Мөнхжаргал “Хэрвээ угаар мэдрэгдсэн тохиолдолд улаан гэрэл асаж, дуу гаргадаг. Угаар мэдрэгч гэрлээс 30 см, хаалга цонхноос 90 см хүртэл зайд байх ёстой. Байшингийн таазанд, аль болох агаарын урсгал бага газар байрлуулах хэрэгтэй. Монгол гэрт бол тоононоос доош 30 см зайд багана дээрээ, эсвэл харалдаа унинд байрлуулна. Олон өрөөтэй айлын хувьд өрөө бүртээ байрлуулах хэрэгтэй" гэв.
Угаарын хий мэдрэгчийг энэ сардаа багтаан гэр хорооллын айл өрхүүдэд суурилуулж дуусах бөгөөд иргэд угаар мэдрэгчийг ажиллаж байгаа эсэхийг "reset" гэсэн товчлуурыг удаан дарж шалгах юм байна.