Иргэд хэрэглэсэн ундаа, усны саваа зориулалтын машинд тушааж, мөнгөө авах боломжтой боллоо.
“Экобин” ХХК үүнд зориулж хаягдал савыг төлбөртэй хүлээн авагч автомат машиныг нийслэлд, "Номин холдинг"-ийн худалдааны төвүүд байршуулж эхэлжээ. Энэ нь хуванцар хог хаягдлыг зөв боловсруулж хэвших соёлыг дэлгэрүүлэх зорилготой юм.
RVM буюу хаягдлыг төлбөртэй хүлээн авагч машинд иргэд хуванцар сав, лааз, цаасан хайрцаг зэрэг хог хаягдлаа тушаагаад нэг сав тутамд 20 төгрөг авна. QR код хэлбэрээр тасалбараа авч, Монгол чатын дурангаар уншуулмагц таны виртуал дансанд шимтгэлгүйгээр мөнгө нь шууд орох юм байна.
Одоогоор дээрх автомат машиныг Хан-Уул дүүрэг болон Баянзүрх дүүргийн Чулуун-Овоод орших "Номин" агуулах худалдааны төв, "Өнөр" хороолол болон зүүн 4 зам дахь "Номин хайпермаркет" дэлгүүр, "Ривер гарден" хороолол дахь "Номин супермаркет" болон Төв цэнгэлдэх хүрээлэнгийн "Наадам центр" зэрэг 12 газар байрлуулаад байна.
Хаягдлыг төлбөртэй хүлээн авагч машины программ хангамж, хөгжүүлэлтийг нийслэлээс 30 сая төгрөгийн санхүүжүүлжээ. Уг машинд "АПУ", “MCS Coca Cola” болон "GN Beverages", "Монос хүнс", "Номин" зэрэг компанийн үйлдвэрлэсэн бүтээгдэхүүний хог хаягдлыг тушаах боломжтой юм. Ингэхдээ 1.2 литрээс томгүй хэмжээтэй савыг хүлээж авах аж.
“Экобин” ХХК хог хаягдал хүлээн авах машинаа цаашид эмнэлэг, сургуулиудад байршуулах гэнэ.
