БНХАУ-ын Чиндао хотноо Жүдо бөхийн "Мастерс"-ын тэмцээн өчигдөр эхэлж, Монголын 10 жүдоч барилдсанаас 2 мөнгө, 1 хүрэл медаль хүртлээ.
Эмэгтэйчүүдийн 48 кг-д Г.Наранцэцэг аваргын төлөө Косовогийн К.Дистрияд базари үнэлгээгээр ялагдаж мөнгөн медалийн эзэн болов. Эрэгтэй 66 кг-д Монголоос 2 бөх барилдаж, хоёулаа медаль хүртлээ.
Энэ жилийн дэлхийн аваргаар томчуудыг давж, шуугиулж чадсан Ё.Басхүү хүрэл медалийн төлөө Израил улсын жүдоч Брауч Шмайловыг нэмэлт цагт базари үнэлгээгээр ялж, хүрэл медалийн эзэн боллоо.
Мөн 66 кг жинд ОУХМ Г.Хэрлэн эрч хүчтэй барилдаж, мөнгөн медалийн эзэн болов. Тэрбээр 2017 онд мастеруудын тэмцээнээс алтан медаль хүртэж байсан юм. Энэ удаад аваргын төлөө Италийн Мануэль Ломбардотай барилдаж, цэвэр ялагдсанаар мөнгөн медаль хүртэв.
Харин манай тамирчин Д.Сумъяа, М.Уранцэцэг нар V-р байранд шалгарлаа.
Өнөөдөр Монголын 6 жүдоч татамид гарч барилдах бөгөөд монголын иргэн болсон Моллаей Саеид болон 81 кг-д Токиогийн “Их дуулга”-д түрүүлсэн Монголын анхны эрэгтэй жүдоч О.Ууганбаатар, ОУХМ Н.Дагвасүрэн нар зодоглоно.
Тус тэмцээнд 66 орны 453 бөх барилдаж байгаа бол манай улсаас 21 тамирчин өрсөлдөж байна.