Австралийн Квийсланд мужийн Кайрнс хэмээх жижиг хотод байрлах "PACIFIC" нэртэй зочид буудалд нэгэн эмэгтэй долоон давхарын тагтнаас үсрэх гэж байхад нь Монгол залуу амийг нь аварчээ.

Үйл явдлыг тодруулбал, өнгөрсөн арваннэгдүгээр сарын 23-ны өдрийн 16-17 цагийн орчимд зочид буудлынхаа өрөөнд амар ч байхад нь тагтан дээр хүчтэй юм унах чимээ гарчээ. Тагт руу гартал долоон давхарын тагтнаас унах гэж буй хүн харагдсан байна. Тэрээр таван давхарт байрлаж байсан тул тагтаар дамжин түүн дээр очиж гарнаас нь барьж авчээ. Цагдаа, тусламж иртэл гарнаас нь барьсаар амийг нь аварч чадсан байна. 

Амиа хорлохыг завдсан эмэгтэй 26 настай хар тамхинаас хамааралтай болсон тул ийм үйлдэл хийжээ. Тухайн үед ч хэрэглэсэн байсан төдийгүй "Би өнгөрсөн хүн надад хэн ч туслаж чадахгүй" гэхээс өөр зүйл хэлээгүй байна.

Австралийн Мельбурн хотноо мэдээлэл технологийн чиглэлээр магистараар сурч буй Т. Чингэс нь аялалаар явж байхдаа тус зочид буудалд байрласан аж.

Т.Чингэс өөрийн фейсбүүк хуудаснаа "Амьд явахдаа хүний амь аварна чинээ бодож явсангүй. Хар тамхи гэдэг зүйлээс хол байгаарай. Битгий хайртай нэгнээ нулимсанд автуулаарай!" гэж нийтэлжээ.

Одоогоор эмэгтэй эмнэлэгт эмчлүүлж байгаа бөгөөд биеийн байдал нь сайн байгаа гэнэ. Харин эмэгтэйн амийг аварсан Т.Чингэсд Австралийн засгийн газраас эр зоригийн одонгоор шагнах аа мэдэгдсэн байна.