Хэдхэн хоногийн өмнө 25 жилийн ойгоо тэмдэглэсэн алдарт "Friends" инээдмийн цувралын тусгай ангийг HBO Max стриминг тавцанд зориулан цувралаар хийхээр бэлдэж байгаа талаар The Hollywood Reporter сэтгүүл мэдэгджээ.
25 жилийн турш алдар хүндээ алдаагүй байгаа тус цувралын гол дүрийн зургаан жүжигчин өнгөрсөн сард дахин бүрэн бүрэлдэхүүнээрээ нэгдэж, хамтдаа байгаа зургаа жүжигчин Женнифер Энистоний инстаграм хуудсанд нийтэлж байсан юм.
Одоогоор энэхүү төсөл нь хэлэлцээрийн шатандаа явж байгаа хэдий ч жүжигчид маань нэгдэн зургаа авхуулсан нь цувралын фенүүдийн дунд маш их хүлээлт үүсгээд байна.
Тусгай ангид зориулан Женнифер Энистон, Лиза Кудроу, Кортни Кокс, Мэтт Леблан, Дэвид Швиммер, Мэтью Перри нараас гадна цувралыг бүтээсэн Дэвид Крейн ба Марта Кауффман нарыг оролцуулахаар хэлэлцэж байгаа аж. Харин энэ талаар HBO Max албан ёсны тайлбар өгөхөөс татгалзжээ.
Дашрамд дурьдахад, "Friends" цуврал Netflix стриминг тавцангаас энэ ондоо багтаж татан буугдах болно. Харин 2020 оноос эхлэн тус цувралын бүх анги HBO Max стриминг тавцангаар цацагдаж эхлэх юм. Эх сурвалжуудын мэдэгдэж буйгаар HBO Max "Friends" цувралын 10 улирлыг стриминг тавцангаараа таван жилийн турш гаргахын тулд нийт 425 сая ам.доллар төлсөн гэжээ. Өмнө нь Netflix компани "Friends" цувралыг 2018 онд өөрсдийн тавцанд байршуулахын тулд 70 сая ам.доллар Warner Bros. кино компанид төлж байсан бол 2019 онд тэд гэрээгээ нэг жилээр сунгахын тулд 100 сая ам.доллар төлж байсан юм.
