Монгол Улсын Үндсэн Хуулийн Цэцийн дарга Д.Одбаяртай холбоотой бэлгийн дарамтын хэргийн талаар Өмнөд Солонгосын хэвлэлүүд өдөр алгасахгүй мэдээлж байна.

Өнөөдөр тус улсын зарим сайтууд Д.Одбаярыг бэлгийн дарамтаас гадна бусдыг айлган сүрдүүлсэн гэх шинэ хэрэгтэй холбогдуулан нэмж шалгахаар болсныг мэдээлжээ. Дээрх мэдээллийн эх сурвалж нь Инчеоны цагдаагийн газар болсон байна.

Хэрэг гарсан өдөр тэрээр Korean Air компанийн нисэх онгоцны багт ажиллаж байсан Монгол охид бүсгүйчүүдийг "Монголд буцаж очихоороо зүгээр өнгөрөөхгүй" хэмээн заналхийлснийг гэрчүүд баталсан гэнэ.

Энэ нь нислэгийн аюулгүй байдлын тухай хуулийг зөрчсөн хэрэг тул нэмж шалгахаар болсныг өнөөдөр мэдээлжээ. Мөн цагдаагийн газарт саатуулагдаад байхдаа монгол орчуулагчаа айлгаж дарамталсан гэгдэж байна.

Д.Одбаярыг маргааш буюу арваннэгдүгээр сарын 6-ны өглөө эрт шалгуулахаар Өмнөд Солонгост ирэх гэж байгааг Инчеоны цагдаагийн газрын төлөөлөгч мэдээлсэн байна.