"Жангум"-ын дүрээр монголчуудын танил болсон БНСУ-ын жүжигчин И Ён Эгийн тоглосон бүрэн хэмжээний нэг ангит кино энэ сарын сүүлээр нээлтээ хийнэ. "Bring Me Home" нэртэй шинэ кино түүний жүжигчний карьер болон хоёр хүүхдийн ээж болсон амьдралд нь өөрчлөлт авчирна хэмээн найдаж буйгаа И Ён Э хэлжээ.
2003 онд “Дэ Жангум” цувралд гол дүр бүтээсэн И Ён Э бүрэн хэмжээний нэг ангит кинонд 14 жилийн дараа анх удаа тоглож буй нь энэ бөгөөд тэрбээр энэ удаа нууцлаг адал явдалт кинонд тоглох шийдвэрийг гаргажээ. И Ён Э хамгийн сүүлд 2005 онд БНСУ-ын найруулагч Пак Чан Вукийн "Sympathy for Lady Vengeance" хэмээх нэг ангит кинонд өшөөгөө авахаар оролдож буй ганц бие ээжийн дүрд тоглодог. Харин "Bring Me Home" кинонд алга болсон хүүхдээ хайж буй ээжийн дүрийг бүтээжээ.
“Sympathy for Lady Vengeance”, “Bring Me Home” киноны аль алинд би хүүхэдтэй эх хүний дүрийг бүтээдэг боловч “Bring Me Home” кинонд тоглохдоо бодит амьдрал дээр ч ээж болсон байсан гэж гэж өдгөө 48 настай жүжигчин хэвлэлийн бага хурлын үеэр хэлсэн байна. Тэрбээр 2009 онд бизнес эрхлэгч Чон Хо Ёнтой гэрлэж, хоёр жилийн дараа ихэр хүү охин төрүүлжээ.
"Bring Me Home" кино энэ оны Торонтогийн Олон улсын кино наадмын шалгуурт нийцэн уригдсан гэдгийг И Ён Э онцолсон байна. Найруулагч Ким Сэүн хэлэхдээ, энэхүү кино бидний өдөр тутмын амьдралдаа төдийлөн анзаардаггүй эхийн агуу хайрыг санагдуулах болно гэжээ. “10 гаруй жилийн өмнө би хүүхэд хайж буй зурагт хуудсыг хараад сэтгэл маш их өвдсөн бөгөөд энэхүү түүхийг бичиж эхэлсэн” гэж тэрбээр ярьжээ.
“Bring Me Home" 11 дүгээр сарын 27-ноос эхлэн БНСУ-ын кино театруудын дэлгэцнээ гарна.
