Энэ оны аравдугаар сарын эхээр Сэлэнгэ аймгийн Ерөө суманд 54 настай О, найман настай хүү Б-ийн хамт баавгайд бариулсан харамсалтай хэрэг гарсан. Тэгвэл үүнээс төд удалгүй тус сумын Бугант тосгоны Цагаантохой гэх газарт, иргэн Ш.Саулегулийн гэрт баавгай орсон талаар тэрбээр олон нийтийн сүлжээгээр мэдээлэв. 

Энэ талаар Ерөө сумын иргэн Ш.Саулегул “Хадлангаа бэлтгэхдээ өвөлжөөндөө нэг гэрээ барьсан юм. Ингээд гэрээ шалгах санаатай очсон чинь баавгай ороод хамаг юмыг бусниулсан байсан. Бид айгаад дотогш орж чадаагүй л дээ. Харин малчин маань гэрийн дотор талыг очиж харсан юм билээ. Авах юмгүй болгосон гэсэн. Гал тогооны шүүгээг тэр чигт нь эвдэлж, хугалсан. Дотор байсан тогоо хүртэл гэрийн гадна талд гарсан дүр зурагтай байсан” хэмээн ярьсан байна. 

Тэдний өвөлжөө Сэлэнгэ аймгийн Ерөө сумаас 18 км, Бугант тосгоноос 50 гаруй километрийн зайтай аж. “Гэрт маань баавгай орсноос хойш хоёр хоногийн дараа дараалан арын айлуудад орсон юм билээ. Нэг айлын эсгий гэр, нөгөө айлын байшинд орсон гэсэн. Байшин руу орохдоо цонхыг нь хагалсан гэцгээж байна лээ. Азаар хүйтэрч амжаагүй болохоор өвөлжөөндөө буугаагүй байсан. Мөн хоёр хоногийн өмнө л гэхэд Бугантаас гурван километрийн зайд байх “Ферм” гэдэг газарт айлын байшингийн цонхыг нь хагалж ороод хамаг хоол хүнс, гурил будааг нь онгичиж хаясан байна гэсэн. Тэр айл Бугантаас 2-3 километрт л байдаг. Тэгэхээр бараг төвдөө гэсэн үг шүү дээ” гэв. 

Дээрх тохиолдлуудаас гадна Сэлэнгэ аймгийн Алтанбулаг, Ерөө, Хушаат, Жавхлант, Хүдэр зэрэг суманд баавгай айлын орон гэрт орсон тохиолдол гарчээ. 

Урьд өмнө хайгуул судалгаагаар явж байгаад ой хээр баавгайд бариулсан тохиолдол гарч байснаас биш баавгай ингэж ихээр энд тэнд очиж, гэр орон руу нь дайрч, хүний амь хохироосон тохиолдол огт гарч байгаагүй аж. Тиймээс баавгай суурьшлын бүс рүү нэвтэрч буйтай холбоотойгоор аймгийн Онцгой комисс ажиллаж эхэлсэн байна. Сэлэнгэ аймагт сүүлийн хоёр жил ямар ч самар ургаагүй.  Тиймээс ой хээр, хөдөө байгаа айлуудыг төв суурин газраа бараадуулж, баавгайд хоол хүнсийг нь хээр тавьж өгөх /биотехникийн/ арга байдаг аж. Энэ ажлыг Сэлэнгэ аймгийн Байгаль орчны газраас зохион байгуулж байгаа юм байна.