x

Попууд сонгуулийнхаа шоуг “Итгэлийн зээл” хэмээх өрийн санаачилгаар эхлүүллээ

Хөшгөө нээгээд удаагүй намрын ээлжит чуулган нэг зүйлийг эс тооцвол өмнөхөөсөө ялгарахааргүй унжгар уйтгартайгаас гадна олон түмэнд урт хугацаанд хэрэг болчихоор том юм төдийлөн хийхгүй нь тодорхой болоод явчихлаа.

Ингэж хэлсний учир нь чуулганы хөшиг нээгдэнгүүт улс төр дэх попууд ил гарч эхэлсэнд юм. Сонгуулийн улирлаар бол энэ чуулган хийгээд ирэх хэдэн cap УИХ-ын гишүүдийн хувьд яах аргагүй юугаар ч хамаагүй попрох, юухнаар ч болов ард олноо дэмнэх цаг нь. Үүний түрүүч гэж болох нэгэн үйл явдал өчигдөр өрнөлөө.

Тодруулбал, УИХ-ын гишүүн Д.Оюунхорол, Н.Амарзаяа, Ё.Баатарбилэг, Х.Баделхан, Б.Батзориг, О.Батнасан, М.Билэгт, С.Бямбацогт, Д.Дамба-Очир, Д.Лүндээжанцан, Л.Мөнхбаатар, Ж.Мөнхбат нар “Итгэлийн зээл олгох тухай” хуулийн төслийг санаачлан боловсруулснаа УИХ-ын дарга Г.Занданшатарт өргөн барилаа.

Өнгөрсөн гурван жилд ард иргэд, аж ахуйн нэгжүүддээ итгэл үзүүлээд банкны зээлийн хүү битгий хэл өндөр настны тэтгэврийн зээлийн хүүг бууруулаагүй, бүр ярих юм бол ЖДҮХС-гийн зээлийг ч ном ёсоор нь өгчихөж чадаагүй атлаа иргэддээ итгээд, ямар ч барьцаагүй зээл олгохоор хууль санаачилсан нь нэг талаар “Энэ хэд ингээд ч болов хуулийн төсөл боловсруулалцаж суугаа нь овоо доо” гэгдэж болох ч нөгөөтэйгүүр маш том даажигнал билээ.

Тэгээд ч сонгуулийн өмнөхөн амжиж боловсруулсан хийгээд баталсан хуулийн төслүүд дараагийн УИХ бүрэлдэхтэй зэрэгцээд цаасан дээрх хууль болж, тоосонд даруулаад гээгддэгийг мартаж болохгүй.

Гэхдээ төсөл санаачлагчдыг ямар үндэслэл, судалгаанд суурилан энэхүү хуулийн төслөө боловсруулсныг хамтдаа сөхье. Тэд “Монгол Улсын иргэдийн багагүй хувь нь амьжиргааны баталгаажих түвшнээс доогуур буюу тогтмол бус, бага орлоготой байгаа тул тэдний орлогыг нэмэгдүүлэх, өрхийн болон бичил бизнесийг төрийн зүгээс дэмжих шаардлагатай байгаа юм.

Гэвч бизнес эрхлэх сонирхолтой тэдгээр иргэдэд зээлийн хүрэлцээ бага, хүү өндөр, барьцаа хөрөнгө байхгүй зэрэг хүндрэлүүд тулгардаг. Тиймээс бага хүүтэй, барьцаа хөрөнгө шаардахгүй, санхүүгийн уян хатан нөхцөлтэй бага дүнтэй зээлийг зорилтот бүлгийн иргэдэд хүргэх зорилгоор Итгэлийн зээл бий болгох эрх зүйн орчин бүрдүүлэх ажлыг 2016 оноос эхлүүлсэн.

Улс орныхоо эдийн засгийг богино хугацаанд сэргээж, өсөлт бий болгон, нийгмийн салбаруудыг дэмжих, иргэдийн амьдралыг сайжруулах Монгол Улсын Засгийн газрын үйл ажиллагааны хөтөлбөрийн зорилтыг хангаж, зорилтот бүлэгт хөнгөн шуурхай, чирэгдэлгүй зээлийн үйлчилгээ үзүүлэх, нийгмийн итгэлцлийг бий болгох бүтээгдэхүүн гаргахын тулд энэхүү хуулийн төслийг боловсруулсан. Монгол Улсын хэмжээнд нийт зээлдэгчийн 90 хувь нь 20.0 сая төгрөг хүртэлх зээл авсан байна.

Итгэлийн зээлийн дээд хязгаар 20.0 сая төгрөг тул нийт зээлдэгчийн 90 хувь буюу давхардсан тоогоор 3.0 сая иргэн, хуулийн этгээдэд урт хугацаатай, бага хүүтэй, барьцаагүй зээл авах боломж бүрдэх юм” гэжээ.

Түүнчлэн уг хуулийн төсөл батлагдсанаар “Нэгдүгээрт, Өрхийн аж ахуй болон бичил бизнес эрхлэгчдийн орлого, хөдөлмөр эрхлэлтийг нэмэгдүүлэхэд бодитой дэмжлэг болно. Хоёрдугаарт, Өрхийн болон бичил зээлийн хүртээмжийг нэмэгдүүлж, санхүүгийн тогтвортой байдлыг хангахад эергээр нөлөөлөн, эдийн засгийг хөгжлийг дэмжинэ.

Гуравдугаарт, Өрхийн дундаж орлого нэмэгдэхээс гадна санхүүгийн сахилга бат, хувь хүний чадавхийг дээшлүүлж, орон нутгийн тогтвортой хөгжлийг хангах, ядуурлыг бууруулахад эергээр нөлөөлнө.

Дөрөвдүгээрт, Иргэдийн санхүүгийн боловсрол, сахилга хариуцлага сайжирна” гэж төсөл санаачлагчид үзэж байгаа аж. Тэдний ирээдүйд гарах үр дүнгээ тодорхойлсон байдлаас харахад л амьдралаас хэт хол мөртлөө амьдралтай нь наалдуулж ярьсаар ирсэн сонгуулийн мөрийн хөтөлбөрөөс нь ялгах аргагүй ижил уншигдаж байгаа биз. Бүр цаашлуулбал, дараагийн ЖДҮ-чдыг төрүүлэх зам мөрийг хуульчилж, хамгаалж өгч байгаа хэрэг ч байхыг үгүйсгэх аргагүй.

Үүнээс гадна санхүүгийн боловсрол, сахилга бат муутай, хадаасаа ч үйлдвэрлэдэггүй иргэддээ хавтгайруулан зээл олгоод тэр аяар нь банкны өрийн дарамтад хатаах эрсдэлтэй. Ийм хуультай хуульгүй өнөөдөр монголчуудын бараг 99 хувь нь өндөр хүүтэй банк, банк бус санхүүгийн байгууллага, ломбард, дэлгүүрийн өрийн дэвтэрт давхар давхар өртэй байгааг сануулах нь зүйтэй. Иргэдийн өрөн дээр өр нэмэхээс гадна татвар төлөгчдийн мөнгийг салхинд хийсгэх хэрэг байгаа ч үү, үгүй ч үү.

Өөрөөр хэлбэл, сонгууль дөхөхөөр эрхэм гишүүд иргэдэд таалагдаж, оноо авч л байвал ямар ч хамаагүй хууль санаачлан батлуулахаар зүтгэж эхэлдгийн ойрын жишээ энэ байлаа. Түүнээс энэ хуулийн төслийг битгий батал гэж байгаа юм огт биш. Үүнээс цааш олон нийтэд таалагдаж л байвал юу ч байж мэдэх хуулийн төсөл, амлалт, санаачилгууд шил даран хөврөх нь тодорхой.

Эхэнд дурдсан энэ удаагийн ээлжит бус чуулганы өмнөхөөсөө ялгарах нэг зүйл нь ирэх хэдэн сард УИХ дахь гишүүн бүр борог амьдрал дундаас гарч ирсэн мэт дүр эсгэж, ард түмнээ хамгийн сайн ойлгож, мэддэг нэгэн болж, “Ард түмэн минь” гэж хоолой зангируулан яриад эхэлнэ. Тэд ямар нэг байдлаар олныг халамжилж, хайрласан хууль санаачилж бүр тодруулбал, улстөрчдийн non топ нь ялгагдахаа байтлаа идэвхэжнэ.

Түүнээс бусдаар өмнөх гурван жил гарангийн хэрүүл маргаан, талцал, биестээ тавьдаг чагт хаалт жам ёсоор үргэлжилнэ. Энэ парламентаас том зүйл хүлээх хэрэггүй. Тэд ирэх хаврын сонгуульдаа бэлдээд гарт баригдаж, нүдэнд харагдах олигтой юм огт хийхгүй.

"Үндэсний шуудан" сонин

iСанал болгох
АНХААРУУЛГА: Та сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээ зөрчсөн сэтгэгдэлийг админ устгах эрхтэй.

Сэтгэгдэл (2)

  • Иргэн (202.9.43.204)
    Зөв зүйтэй юм бишүү
    2019 оны 10 сарын 04 | Хариулах
  • Зочин (202.9.43.204)
    Зээл авна шүү
    2019 оны 10 сарын 04 | Хариулах
iРедакцийн сонголт
iШинэ мэдээ
Нөмрөгийн түймрийн хохирлын үнэлгээг хуулийн байгууллагад шилжүүлжээ саяхан Агаарын бохирдлыг бууруулах эрчим хүчний хэмнэлттэй, дулаан хуримтлуурын технологийг иргэдэд танилцуулна 11 мин Г.Ганбаатар: Засгийн газрын өр 16 тэрбум ам.долларт дөхсөн нь цаашид анхаарах ёстой маш том дохио 21 мин “Евро-3” болон түүнээс дээш стандартын АИ-92 автобензиний үнийг 1000 хүртэл төгрөгөөр бууруулна 14 цаг 6 мин Юун Ялта, юун дэлхийг хуваах! 14 цаг 35 мин Шөнийн автобус 22:00-02:00 цагийн хооронд үйлчилж байна 14 цаг 42 мин Ж.Баярмаа: Гэмт хэрэгт холбогдсон төрийн өндөр албан тушаалтнуудаас байнга хариуцлага нэхэх нь чухал 14 цаг 46 мин Засгийн газар: Төрийн өмчит компанийн тоог 85 болгон цөөлнө 15 цаг 31 мин ТББХ Ерөнхийлөгчийн чөлөөлөгдөх хүсэлтийг дэмжлээ 15 цаг 44 мин З.Мэндсайхан: Оюу Толгойн хэлэлцээрийн баг удахгүй ирнэ 22 цаг 1 мин Мэдээж “Ар нь түүз!” 22 цаг 12 мин И-спорт болон оюуны спортын Азийн анхдугаар наадмыг 2027 онд зохион байгуулна 22 цаг 30 мин Улаанбаатарт өдөртөө 8 хэм хүйтэн 22 цаг 37 мин Аймгуудын өрсөлдөх чадварын 2026 оны тайлангийн үр дүнг танилцуулна 22 цаг 41 мин Д.Трамп Хятадад Ким Жөн Унтай уулзаж магадгүй гэв 22 цаг 46 мин Тайванийн Гадаад хэргийн сайд АНУ-д хоёр дахь удаагаа очжээ 22 цаг 51 мин Хятадын арбитр: Манай төрийн өмчит банкуудаас татсан зээлүүдийг “Болдтөмөр Ерөө гол” ХХК-ийн төмрийн хүдрийн уурхайд зохих ёсоор ашигласан байна 22 цаг 56 мин Д.Медведев улирлын хаалтын тэмцээнийг хожлоор эхлүүллээ Уржигдар 18 цаг 11 мин “Вояжер-1” сансрын төхөөрөмж түүхэн дээд амжилт тогтооход ойрхон байна Уржигдар 18 цаг 07 мин Голомт банк “Euromoney Awards”-ын дөрвөн төрөлд шилдгээр шалгарлаа Уржигдар 14 цаг 22 мин
iИх уншсан
Аймгийн заан Ц.Гонгорын нэрэмжит УАШТ-д Р.Омар түрүүллээ Ж.Шагжийн нэрэмжит олон улсын эрдэм шинжилгээний хурал болно... Монголын мөсөн сийлбэрчид Мадридын тэмцээнд түрүүллээ УИХ-ын дарга С.Бямбацогт БНСВУ-ын Үндэсний ассамблейн гишүүн... АН дотор угсарсан МАН-ын схем Д.Жаргалсайханыг Барилга, хот ... Э.Өлзийбаяр: Намын дотоод сонгуулийг МАН-тай нийлж луйвардса... З.Мэндсайхан: Тэтгэвэр, цалингийн нэмэгдлээр дамжуулан ажлын... Юун Ялта, юун дэлхийг хуваах! Хууль зөрчиж хэрэг буцаасаар байгаа Дээд шүүхийг “байцаах” х... 1926-1930 онд Герман улсад суралцсан монгол залуучуудын боло... У.Хүрэлсүх: Гүтгэлэг худал болохыг нотлохын тулд ажлаа өгч б... Д.Трамп Хятадад Ким Жөн Унтай уулзаж магадгүй гэв Цагаачд иргэдийн шинэ цуваа АНУ-ын хилийг чиглэв “Герман, Франц улсад суралцсан анхны эмэгтэйчүүд” үзэсгэлэнг... Энэ онд 51 байршилд 63.47 км авто замыг шинэчлээд байна Гавьяат тамирчин Э.Цэндбаатар 16 дараалан яллаа УИХ-ын чуулганаар 2027 оны төсвийг эцэслэн баталлаа Хятадын арбитр: Манай төрийн өмчит банкуудаас татсан зээлүүд... Улаанбаатарт өдөртөө 4 хэм хүйтэн Дундаж давхаргын эсрэг хийж буй Монгол төрийн ужиг дайн
Top