Нийслэлийн Авто замын хөгжлийн газраас хийж буй замын засвар, шинэчлэлтийн ажлын улмаас өнөөдрөөс (долдугаар сарын 1) эхлэн наймдугаар сарын 15 хүртэл 100 айлын замыг хэсэгчлэн хааж байгаа тухай мэдээллээ. Нийт 1,6 км камыг өргөтгөн шинэчлэхэд 3,5 тэрбум төгрөг төсөвлөсөн бөгөөд суурьшлын үс ихтэй, олон аж ахуйн нэгж үйл ажиллагаа явдуулдаг, ачаалал ихтэй зам учраас хөдөлгөөнийг хэсэгчлэн хаах юм байна.
Өнөөдрөөс 10-ны хүртэл 32-ын тойргоос Хангай хотхон хүртэлх замыг, 14-нөөс 28-нд Хангай хотхоны уулзвараас УБЕГ хүртэл, УБЕГ-аас 100 айлын уулзвар хүртэлх замыг 28-наас наймдугаар сарын 15 хүртэл хааж, наймдугаар сарын 15-ны дотор замын зорчих хэсгийг дуусган ашиглалтад оруулна гэв. Мөн цаг агаарын нөхцөл байдлаас шалтгаалан тав хоногийн наана, цаана гарч магадгүй гэдгийг анхаарууллаа.
Шинээр баригдах замын зорчих хэсгийн өргөн 12 м, хоёр талдаа 1 м өргөн ногоон байгууламжтай, явган хүний зам 2,25 м, дугуйн зам 1,6 м, мөн гэрэлтүүлэг, ус зайлуулах хоолойтой байх юм. Цаашдаа нийслэлээс барих бүх зам стандартын дагуу ус зайлуулах хоолой, гэрэлтүүлэг, явган болон дугуйн замтай байх аж.
Эхний ээлжийн замыг хаах хугацаанд нийтийн тээвэр буюу жижиг оврын техникүүд 32-ын тойргоос 100 айл руу Хангай хотхоны урдуур буюу зүүн талаар 100 айл руу, хоёр дахь ээлжийн замыг хаах хугацаанд 100 айлын зүүн талаар Сэлбэ голыг дагасан далангийн замаар УБЕГ луу холбогдох юм байна.
Замын төсөвч өртөг өндөр байгаа талаар "Замын бүтээн байгуулалтаас гадна доор нь маш их хэмжээний шугам сүлжээ байгаа. Энэ шугам сүлжээг зайлуулах, хүчитгэх, тунелийн системд оруулахад гэх мэт далд ажлын барилгад маш их мөнгө орно" гэв. Мөн шинээр баригдах зам дагуу дөрвөн ч зогсоолыг байгуулах юм байна.
Замын засвар шинэчлэлтийн ажил эхэлсэнтэй холбогдуулан 100 айлын зам дагуу ил задгай, зөвшөөрөлгүй үйл ажиллагаа явуулдаг, тоос шороо, хог хаягдал ихээр гаргадаг аж ахуйн нэгж, иргэдийг Налайхын үйлдвэрлэл технологийн парк руу нүүлгэж эхэлжээ. Харин зөвшөөрөлтэй бусад аж ахуйн нэгж, иргэдийн хувьд өөрийн байрандаа үйл ажиллагаа явуулахад нь саад болохгүй гэв.
