Монгол Улсын гавьяат тамирчин, сонирхогчдын боксын Олимп, ДАШТ-ий мөнгөн медальт Н.Төгсцогтын ээлжит тулаан Улаанбаатарын цагаар өнөөдөр өглөө 9 цагт болж мэргэжлийн боксын IBO холбооны аваргын бүсийн эзэн боллоо.
Тулаан Нью Йоркийн Брүүклиний “Barclays Center”-т эхлэж, Монголд анх удаа албан ёсны эрхтэйгээр "NTV" телевиз шууд дамжуулсан үзүүллээ.
Н.Төгсцогт Доминиканы боксчин Клаудио Маррейротой 12 үе тулалдаж, онооны илүүгээр ялалт байгууллаа. Манай тамирчин тоглолтын туршид довтолж, удаа дараалсан оновчтой цохилтууд хийж, өрсөлдөгчөө хүнд байдалд оруулснаар ялалт байгуулж, аваргаллаа.
“Barclays Center”-т Монголын 200 гаруй хөгжөөн дэмжигчид цуглан “King Tug"-ийг дэмжжээ. Хөгжөөн дэмжигчдийн дунд олимпийн аварга Э.Бадар-Ууган, аварга Ч.Санжаадамба, жүжигчин Э.Цолмонбаяр болон АНУ-д ажиллаж, амьдарч буй, чөлөөт бөхийн тамирчид болох Л.Сэргэлэнбаатар, Д.Лхагвадорж нарын спортынхон байсан юм.
Дашрамд дурдахад, Н.Төгсцогт хамгийн сүүлд өнгөрсөн оны дөрөвдүгээр сард 29 ялалттай босоо явсан Мексикийн Хорхе Лараг 33 секундэд нокаутаар ялж байсан юм.
Н.Төгсцогт, IBO холбооны 57.2 кг жингийн дэлхийн аварга цолыг эзэмшсэнээр WBC холбооны дэлхийн аварга цол, бүсийн төлөө тулалдах эрхтэй болж байгаа аж.
Сэтгэгдэл (1)