Тайванийн улс төрийн амьдралд ховор тохиолдох үйл явдал болох гэж байна. Сөрөг хүчний Гоминдан намын 24 хууль тогтоогчийг эргүүлэн татах санал хураалт 2025 оны долдугаар сарын 26-нд явагдахаар болжээ. Тус нам парламентад 52 суудал эзэлдэг бөгөөд өөр нэг сөрөг хүчний намтай хамтран 113 гишүүнтэй хууль тогтоох байгууллагад олонхын байр суурийг эзэлж байгаа юм. Харин эрх баригч Ардчилсан дэвшилтэт нам (АДН) одоогоор 51 суудалтай.
Иргэний хөдөлгөөнөөс санаачлан Гоминданы хууль тогтоогчдыг эргүүлэн татах санал хураалтыг шаардаж, гарын үсэг цуглуулсан байна. Сонгуулийн төв хороо энэ ажиллагааг албан ёсоор хүлээн зөвшөөрч, санал хураалтыг тухайн 24 гишүүний төлөөлдөг сонгуулийн тойргуудад явуулахаар товлосон байна.
Хуулийн дагуу, тухайн тойргийн сонгогчдын дөрөвний нэгээс доошгүй нь эргүүлэн татахыг дэмжсэн санал өгч, мөн дэмжсэн саналын тоо эсэргүүцснээс давсан тохиолдолд тухайн хууль тогтоогч суудлаа алдана. Хэрэв энэ үйл явц амжилттай хэрэгжвэл нөхөн сонгууль зарлагдаж, АДН цөөнгүй суудал нэмж авах замаар парламентын олонх болох боломжтой.
Энэ бол Тайванийн ардчилсан тогтолцоонд сөрөг хүчний гишүүдийг иргэдийн хүсэлтээр эргүүлэн татах түүхэн шинжтэй алхам бөгөөд улс төрийн хүчний тэнцвэрт байдалд нөлөөлөх чухал үйл явц болох нь тодорхой байна.
Эх сурвалж: NHK
