Их Британийн Гадаад хэргийн сайд Дэвид Ламми Женев хотноо Франц, Герман болон Ираны Гадаад хэргийн сайд Аббас Арагчитай уулзахаар очжээ. Европын холбооны гадаад бодлогын ахлах төлөөлөгч Кая Каллас мөн уулзалтад оролцоно. Хэрэв уулзалт товлогдсон цагтаа явагдвал энэ нь Израиль Ираны эсрэг цохилт эхэлснээс хойш барууны болон ираны дипломат төлөөлөгчдийн анхны өндөр түвшний уулзалт болно.

Францын Гадаад хэргийн сайд Жан-Ноэль Барро уг уулзалтыг “Ираны цөмийн болон баллистик пуужингийн хөтөлбөрөөс ухрах урт хугацааны шийдэлд хүрэхийг зорьсон” хэмээн тодорхойлсон бол Дэвид Ламми “Ойрх Дорнодын хямралыг зогсоож, бүс нутгийн нөхцөл байдлыг дордуулах алхам гаргахгүй байх цаг нь болсон” хэмээн мэдэгджээ.

АНУ болон Их Британи Иран хэзээ ч цөмийн зэвсэг эзэмших ёсгүй гэдэг дээр санал нэгтэй байгаа бөгөөд Дэвид Ламми, Марко Рубио нарын уулзалтын үеэр энэ байр сууриа дахин нотолсон байна. Тэд “ирэх хоёр долоо хоногийн хугацаанд дипломат шугамаар шийдвэрлэх боломж бий” гэж үзэж байгаа юм.

Үүний зэрэгцээ АНУ-ын Ерөнхийлөгч Дональд Трамп “Иранд хэлэлцээ хийх боломж удаа дараа олгосон ч тэд тохиролцоонд хүрч чадаагүй. Одоо хэлэлцээний бодит боломж бий эсэхийг үнэлсний дараа, ирэх хоёр долоо хоногийн дотор АНУ-ын оролцооны талаар шийдвэр гаргана” хэмээн мэдэгдсэн байна.

Израиль, Ираны хоорондын зэвсэгт мөргөлдөөн долоо дахь өдрөө үргэлжилж байгаа бөгөөд Израилийн Сорока эмнэлэгт хийсэн цохилтын улмаас 71 хүн гэмтэж, Израилийн Батлан хамгаалахын сайд Ираны удирдагчийг шууд шүүмжилжээ. Иран эмнэлгийг бус, ойролцоох цэргийн байгууламжийг онилсон гэж мэдэгдсэн бөгөөд Израиль өчигдөр шөнө Ираны Арак дахь хүнд устөрөгчийн реактор зэрэг цөмийн байгууламжуудад цохилт өгсөн байна.

Харин Хезболлах бүлэглэлийн удирдагч Шейх Наим Кассем “Израиль-Ираны мөргөлдөөнд өөрсдийн үзэмжээр оролцоно” гэж мэдэгдсэн нь бүс нутгийн байдалд нэмэлт эрсдэл дагуулаад байна. АНУ-ын Сирийн асуудал хариуцсан тусгай элч Том Барак Хезболлахыг хөндлөнгөөс оролцохгүй байхыг анхааруулсан боловч бүлэглэл өөрийн байр суурийг өөрчлөхгүй гэдгээ илэрхийлжээ.

Эх сурвалж: BBC, Reuters