Forbes-ийн мэдээлснээр, Японы “Nippon Steel” компани Америкийн “United States Steel” компанийг 14.1 тэрбум ам.доллараар өөртөө нэгтгэх үйл явцыг албан ёсоор дуусгасан тухайгаа мэдэгдлээ.

Нью-Йоркийн үнэт цаасны бирж зургаадугаар сарын 18-ны өдөр буюу лхагва гарагт “U.S. Steel” компанийн хувьцааны арилжааг зогсоосноор нэгтгэх үйл явц бүрэн дууссаныг баталжээ. Арилжаа хаагдах мөчид “Nippon Steel”-ийн хувьцааны ханш 2.42 хувиар унаж, 2705 иен болсон байна.

Нэгж хувьцааг 55 ам.доллароор үнэлэн хийсэн дээрх хэлцэл нь дэлхийн хоёр дахь том ган үйлдвэрлэгч болох “Nippon Steel”-ийг Америкийн гангийн салбарт хүчтэй өрсөлдөгчийг бий болголоо гэж Bloomberg агентлаг мэдээлжээ. Мөн “Nippon Steel” компани АНУ-ын Ерөнхийлөгч Дональд Трампын тогтоосон 50 хувийн гангийн татвараас чөлөөлөгдөх боломжтой болсон нь энэ хэлцлийн чухал үр дүн юм.

Ерөнхийлөгч Трамп “Nippon Steel” болон “U.S. Steel” компаниудыг нэгтгэхийг зөвшөөрсөн зарлигт зургаадугаар сарын 13-нд гарын үсэг зурсан байна. Уг зарлигийг хоёр компани АНУ-ын засгийн газартай үндэсний аюулгүй байдлын тухай гэрээ байгуулсны дараа гаргасан юм. Уг гэрээний дагуу засгийн газарт “алтан хувьцаа” олгохоор тохиролцсон тухай хоёр компанийн хамтарсан мэдэгдэлд дурджээ.

Засгийн газар “алтан хувьцаа”-г эзэмшсэнээр хөрөнгө оруулалтыг бууруулах, компанийн нэрийг өөрчлөх, төв байр, ажлын байр, үйлдвэрлэлийг хилийн чанадад шилжүүлэх зэрэг асуудалд хяналт тавих боломжтой болсон байна.