АНУ-ын Ерөнхийлөгч Дональд Трампын 79 насны төрсөн өдрийг тохиолдуулан түүний засаг захиргаа Вашингтон хотын төвд томоохон хэмжээний цэргийн парад зохион байгууллаа. Энэхүү арга хэмжээ нь арми болон зэвсэгт хүчний 250 жилийн ойтой давхцаж буй хүндэтгэлийн үйл ажиллагаа гэж тайлбарлагдсан ч олон нийт, иргэний нийгмийн зүгээс хүчтэй эсэргүүцэлтэй тулгараад байна.

Парад орон нутгийн цагаар оройн 19:30 цагт эхэлж, Линкольны дурсгалын цогцолбороос эхлэн Цагаан ордны өмнөд тал хүртэл үргэлжилсэн бөгөөд АНУ-ын армийн мэдээлснээр “Abrams” танк зэрэг 150 орчим хуягт техник, “Blackhawk” зэрэг 50 нисдэг тэрэг, нийт 6700 гаруй цэргийн алба хаагч оролцсон байна. Энэ нь 1991 оны Булангийн дайны дараа Вашингтонд зохион байгуулагдсан анхны томоохон цэргийн парад болж байгааг хэвлэлүүд онцолжээ.

Цэргийн парадыг армийн 250 жилийн ой, эх орныхоо төлөө амь насаа зориулсан баатруудад зориулсан хүндэтгэл гэж тайлбарласан ч зарцуулсан 45 сая ам.долларын төсөв нь маргаан дэгдээж, нөөцийг улс төрийн зорилгоор ашиглалаа гэсэн шүүмжлэлтэй тулгарчээ. Армийн хэвлэлийн төлөөлөгч, дэд хурандаа Патрик Хустед “Энэ бол эх оронч үзэл, дурсамж, бахархлын өдөр” хэмээн тайлбарласан ч иргэдийн зүгээс Трампын төрсөн өдөртэй зэрэгцүүлсэн нь түүнийг улс төрийн оноо авах гэсэн хэрэг гэж хардсаар байна.

Түүнчлэн АНУ даяар “Хаан хэрэггүй” нэртэй эсэргүүцлийн хөдөлгөөн өрнөж, 2000 гаруй газарт жагсаал зохион байгуулагдаж болзошгүй байгаа талаар иргэний хөдөлгөөнүүд мэдээлсэн. Энэ жагсаал нь АНУ-ын үндсэн ардчиллын зарчмуудыг хамгаалах, зэвсэгт хүчнийг улс төрийн зэвсэг болгохоос сэргийлэх зорилготой гэж зохион байгуулагчид мэдэгдсэн байна. Үүссэн нөхцөл байдал нь олон нийтийн мөргөлдөөнд хүргэх эрсдэлтэй хэмээн зарим шинжээчид анхааруулж байна.

Төрсөн өдөр, цэргийн хүч харуулсан сүр хүчний парад хоёр хосолсон энэ үйл явдал нь АНУ-ын дотоодын улс төрийн хуваагдлын илэрхийлэл болон өргөжиж, олон нийтийн анхаарлыг татаж байна.

Эх сурвалж: NHK