Европын Холбоо Орос болон Беларусаас авдаг зарим хөдөө аж ахуйн бүтээгдэхүүний гаалийн тарифыг нэмэгдүүлэхээр шийдвэрлэж, ирэх долдугаар сарын нэгнээс мөрдөж эхлэх болсноо зарлалаа. Тус шийдвэр нь Европын фермерүүд болон бордоо үйлдвэрлэгчдээ хамгаалахаас гадна Оросын экспортын ашгийг хумих зорилготой гэж Европын Зөвлөлийн цахим сайтад дурдсан талаар Германы хэвлэлүүд мэдээлжээ.

Шинэ тарифын хүрээнд бордооны татварыг гурван жилийн хугацаанд шат дараатайгаар өсгөхөөр төлөвлөсөн байна. Энэ нь Европын орнуудын Оросын бүтээгдэхүүнээс хамаарах хамаарлыг бууруулж, Украинд явуулж буй цэрэг дайны ажиллагааг санхүүжүүлэхэд чиглэсэн оросын ашгийг таслах алхам гэж Европын Зөвлөл мэдэгджээ.

ЕХ-г энэ жил даргалж буй Польш улс “Европын аюулгүй байдал эн тэргүүнд” гэсэн уриаг баримтлан Оросоос хамаарах эдийн засгийн нөлөөг бууруулах бодлого явуулж байгааг Польшийн Эдийн засгийн хөгжил, технологийн яамны төлөөлөгч Михал Барановский илэрхийлсэн байна. Тэрээр ЕХ цаашид Оросын экспортын орлогыг улам хумих арга хэмжээнүүдийг ч авч хэрэгжүүлнэ гэдгийг онцолжээ.

Шинэ тарифаар Оросоос ирдэг бүх төрлийн ХАА-н бүтээгдэхүүнүүдэд нэмэлт гаалийн татвар ногдуулах бөгөөд үүнд бордооны төрлийн бүтээгдэхүүн онцгой байр суурь эзэлж байна. Тухайлбал, 2023 онд ЕХ нийт 3.6 сая тонн буюу 1 тэрбум 280 сая еврогийн өртөгтэй бордоог Оросоос импортолсон нь ЕХ-ны нийт бордоо импортийн дөрөвний нэгийг эзэлж байжээ. Үүнээс 15 хувийг азотын бордоо эзэлж байсан байна.

Харин Оросын зүгээс энэ шийдвэрийг шүүмжилж, “ЕХ өөрийн хөл рүү буудлаа” хэмээн Кремлийн хэвлэлийн төлөөлөгч Дмитрий Песков мэдэгдэв. Тэрбээр “ЕХ одоо манайхаас илүү үнэтэй, чанар муутай бордоог авах болно. Учир нь Оросын азотын бордоо дэлхийн хамгийн өндөр чанартай нь байдаг” гэж хэлсэн байна.

Эх сурвалж: DW, Handelsblatt, EU Council, TASS