Бүгд Найрамдах Солонгос Улсад 2025 оны зургадугаар сарын 3-нд ерөнхийлөгчийн сонгууль товлогдсон бөгөөд энэ нь эрх баригч Ерөнхийлөгч Юүн Сог Ёлийн эрх мэдлээ хэтрүүлж, улс даяар цэргийн онц байдал зарласны улмаас огцорсонтой холбоотойгоор гэнэт зарлагдсан юм.
Энэхүү улс төрийн нөхцөл байдлын улмаас БНСУ-ын Үндсэн хуульд нэмэлт, өөрчлөлт оруулах талаар улс төрчдийн хэлэлцүүлэг идэвхжиж, Ерөнхийлөгчийн эрх мэдэл, бүрэн эрхийн хугацаанд өөрчлөлт оруулах асуудал улс төрийн анхаарлын төвд орж ирлээ.
Солонгосын Үндсэн хуульд хамгийн сүүлд 1987 онд нэмэлт өөрчлөлт оруулж, тухайн үеэс хойш ерөнхийлөгчийг ард түмнээс шууд сонгодог, нэг удаа таван жилээр бүрэн эрхээ хэрэгжүүлэх журмыг мөрдөж ирсэн.
Харин энэ удаагийн сонгуульд өрсөлдөж буй сөрөг хүчний Ардчилсан намын нэр дэвшигч И Жэ Мён 2030 оноос эхлэн ерөнхийлөгч дөрвөн жилээр хоёр удаа сонгогддог байх санал дэвшүүлж байна. Тэрээр “Ерөнхийлөгчийн эрх мэдэл нэг хүнд хэт төвлөрөх ёсгүй, харин хариуцлага нь илүү тодорхой болох ёстой” хэмээн анхны мэтгэлцээний үеэр онцолжээ.
Эрх баригч намаас нэр дэвшиж буй Ким Мүн Сү мөн адил дөрвөн жилээр хоёр удаа ерөнхийлөгчийн бүрэн эрхээ хэрэгжүүлэх зарчмыг дэмжиж байгаа бөгөөд хэрэв ялалт байгуулбал өөрийн бүрэн эрхийн хугацааг 3 жил болгон танах саналтай байгаагаа илэрхийлжээ. Энэ нь 2028 онд ерөнхийлөгчийн болон бүх нийтийн сонгуулийг нэгэн зэрэг явуулах бололцоог бүрдүүлнэ гэж тэрээр тайлбарлаж байна.
Түүнчлэн Ким Мүн Сү ерөнхийлөгчийн халдашгүй дархан байдлыг бууруулах тухай ч амлалт өгсөн нь олон нийтийн анхаарлыг татаж байна.
Сүүлийн жилүүдэд ерөнхийлөгчийн бүрэн эрхийг “дөрвөн жилээр хоёр удаа” байхаар өөрчлөхийг дэмжиж буй улс төрчдийн тоо нэмэгдсээр байгаа бөгөөд иргэдийн дунд явуулсан санал асуулгаар нийт 67 хувь нь Үндсэн хуульд энэ өөрчлөлтийг дэмжинэ гэжээ.
Харин Үндэсний ассамблейн дарга Ү Вон Шиг уг өөрчлөлтийг санал асуулгаар баталгаажуулахын тулд зургадугаар сарын 3-нд болох ерөнхийлөгчийн сонгуультай зэрэгцүүлэн Үндсэн хуульд нэмэлт өөрчлөлт оруулах бүх нийтийн санал асуулга зохион байгуулах санал гаргасан боловч, Үндэсний ассамблейн олонхийг бүрдүүлдэг Ардчилсан намын зүгээс уг саналыг дэмжээгүй байна.
Ийнхүү БНСУ-ын дараагийн төрийн тэргүүн тодрохын зэрэгцээ тус улсын төрийн эрх мэдлийн хуваарилалт, хариуцлагын тогтолцоог шинээр тодорхойлох түүхэн өөрчлөлтүүдийн ирмэг дээр ирээд байна.
Эх сурвалж: Yonhap News, KBS World, Korea Herald
