АНУ-ын Ерөнхийлөгч Дональд Трамп Саудын Арабт хийж буй айлчлалынхаа үеэр Туркт болох Орос, Украины төлөөлөгчдийн хэлэлцээнд АНУ-ын Төрийн нарийн бичгийн дарга Марко Рубио оролцохоо баталлаа. Хэлэлцээ энэ долоо хоногийн сүүлчээр, магадгүй тавдугаар сарын 16-нд буюу пүрэв гарагт Истанбул хотод болох төлөвтэй байна.
“Бид уулзалтаас нааштай үр дүн хүлээж байна. Марко Туркт очиж хэлэлцээнд оролцоно” хэмээн Ерөнхийлөгч Трамп мэдэгджээ.
Хэлэлцээнд Трампын томилсон хоёр тусгай төлөөлөгч — Кит Келлог болон Стиф Уиткофф нар мөн оролцоно гэж өмнө нь хэвлэлүүд мэдээлсэн. Ерөнхийлөгч Трамп өөрөө ч уулзалтын өдөр Истанбулд очих магадлалтай гэдгээ илэрхийлсэн.
ОХУ-ын Ерөнхийлөгч Владимир Путин Истанбулд тавдугаар сарын 15-нд шууд хэлэлцээ хийх саналыг Украины талд хүргүүлсэн ч хэлэлцээ яг болох эсэх, мөн ямар түвшинд явагдах нь одоогоор бүрэн тодорхойгүй хэвээр байна. Харин Украины Ерөнхийлөгч Володимир Зеленский уг уулзалтад биечлэн оролцох хүсэлтэй байгаагаа илэрхийлсэн бөгөөд Оросын доод түвшний төлөөлөгчидтэй уулзахаас татгалзаж, зөвхөн Путинтэй л шууд уулзах сонирхолтой байгаагаа мэдэгдсэн.
ОХУ-ын тал төлөөлөгчдөө Истанбулд илгээнэ гэдгээ баталсан боловч Ерөнхийлөгч Путин өөрөө оролцох эсэх талаар тодорхой мэдээлэл өгөөгүй байна. Энэ уулзалт хоёр талын зэвсэгт мөргөлдөөнийг бууруулах, түр гал зогсоох хэлэлцээний шинэ суурь болох магадлалтай гэж ажиглагчид үзэж байна.
Эх сурвалж: BBC
