Католик шашны хамгийн өндөр дээд суудал болох Дээрхийн гэгээнтний албан тушаалд АНУ-ын Чикаго хотын кардинал Роберт Францис Превост сонгогдож, Ромын Католик сүмийн 267 дахь папа боллоо. Тэрбээр өнөөдрөөс эхлэн XIV Лео нэрээр дэлхийн 1.4 тэрбум католик сүсэгтнийг тэргүүлэхээр боллоо.

Шинэ пап сонгогдсоныг уламжлал ёсоор Ватиканы Систин сүмийн яндангаас цагаан утаа гарган зарласан бөгөөд удалгүй Хувилгаан Петрын сүмийн тагтан дээрээс "Habemus Papam" (Бидэнд Папа байна) гэсэн алдарт үгийг дуулгаж, шинэ тэргүүнээ нийтэд танилцуулсан юм. Энэ үеэр түүнд цагаан хувцсыг нь өмсгөж, шинэ нэрээ зарласан нь Ватиканы уламжлалт “Урби эт Орби” ёслолын нэгэн чухал үйл явдал боллоо.

Перугийн америк даяанч гэгддэг Роберт Превост Латин Америкт олон жил амьдарч, тус улсын хамба ламаар ажиллаж байсан бөгөөд Перу-Америкийн давхар иргэншилтэй юм. Тэрбээр Папын сэнтийд өргөмжлөгдсөн АНУ-аас тодорсон анхны пап, мөн Америк тивээс гарсан хоёр дахь папа болж, түүхэн амжилт тогтоолоо.

Тавдугаар сарын 7-нд болсон нууц санал хураалтад дэлхийн 70 орны 133 кардинал Систин сүмд хаалттай хаалганы цаана хуралдсан ч тухайн өдөр тохиролцоонд хүрээгүй тул яндангаар хар утаа гарч байсан юм. Саналын хуудас шатаахдаа утааны өнгийг өөрчлөхийн тулд тусгай химийн бодис ашигладаг бөгөөд хар утаа нь тохиролцоонд хүрээгүйг, цагаан утаа нь шинэ пап тодорсныг зарладаг уламжлалтай.

Шинэ папын сонголт дэлхий нийтэд гэнэтийн явдал болж, олон хүнийг гайхшруулсан юм. Түүний сонгосон XIV Лео нэр ч онцгой анхаарал татаж байна. Өмнөх Пап XIII Лео нь 1878-1903 онд Католик сүмийг удирдаж, нийгмийн шударга ёсыг эрхэмлэсэн, орчин цагийн Католик сүмийн суурийг тавьсан гэдгээрээ түүхэнд нэрээ үлдээсэн билээ.

Шинэ пап Лео ч мөн өмнөх Пап Францисын нээлттэй, хүмүүнлэг бодлогыг үргэлжлүүлэхээ амлаж, дэлхийн энх тайван, ядуурал, шударга ёсны төлөө ажиллахаа илэрхийлсэн байна.

Эх сурвалж: DW