Хятадын эрдэмтэд цөмийн материал огт агуулаагүй ч “химийн хүчтэй гинжин урвал” үүсгэж чаддаг устөрөгчийн тэсрэх төхөөрөмжийг амжилттай туршсан талаар “South China Morning Post” мэдээллээ. Энэ төхөөрөмж нь цөмийн бөмбөг биш ч өндөр хэмийн халуун, урт хугацааны дэлбэрэлт үүсгэх чадвартайгаараа онцлог юм.

Хятадын Төрийн өмчит хөлөг онгоцны үйлдвэрлэлийн корпорацын (CSSC) харьяа 705 дугаар шинжлэх ухааны хүрээлэн энэхүү төхөөрөмжийг бүтээсэн бөгөөд тус хүрээлэн нь усан доорх зэвсгийн системийн судалгаагаар мэргэшсэн байгууллага юм.

Шинэ тэсрэх төхөөрөмжийн онцлогууд:

• Жин: 2 кг

• Дэлбэрэлтийн үргэлжлэх хугацаа: 2 секунд орчим

• Гарч буй температур: 1000 хэмээс дээш халуун галт бөмбөлөг үүсгэдэг

• Харьцуулалт: Тротил бодистой харьцуулахад дэлбэрэлтийн үргэлжлэх хугацаа 15 дахин урт

• Гол технологи: Магнийн гидрид хэмээх химийн нэгдэл ашиглан устөрөгчийг их хэмжээгээр тогтоон барьдаг.

Энэхүү шинэ төрлийн тэсрэх төхөөрөмж нь:

• Цөмийн материалгүй учраас олон улсын хяналтын тогтолцоонд хамаарахгүй,

• Дэлбэрэлтийн хүчийг нарийн тохируулах боломжтой тул стратегийн хувьд олон байг зэрэг устгах чадвартай,

• Усан доорх байлдааны хэрэгсэл болон хязгаарлагдмал орчинд өндөр үр дүнтэйгээр ашиглагдах магадлалтай гэж шинжээчид дүгнэж байна.

Энэ шинэ туршилт Хятадын цэргийн шинжлэх ухаанд шинэ эрин үе эхэлж байгааг илтгэж магадгүй бөгөөд цөмийн зэвсэггүй ч өндөр эрчимтэй урвал үүсгэх тэсрэх төхөөрөмжүүдийн боломжийг тэлж байна.

Эх сурвалж: South China Morning Post (SCMP)