Мексикийн нийслэл Мехико хотод энэ сарын 25-наас эхлэх шайбтай хоккейн III дивизоны дэлхийн аварга шалгаруулах тэмцээнд Монголын үндэсний шигшээ баг оролцохоор бэлтгэлээ базааж байна. Тус тэмцээн 10 хоног үргэлжлэх бөгөөд Монгол, Мексик, БНАСАУ, Филиппин, Сингапур, Хонконгийн багууд өрсөлдөхөөр болжээ.
Монголын шигшээ багийг ахлах дасгалжуулагч А.Мэргэн, дасгалжуулагч Н.Отгонбаяр, Н.Мишигсүрэн нар удирдаж байгаа бөгөөд 21 тамирчнаас бүрдсэн баг Чингэлтэй дүүргийн Спортын ордонд бэлтгэлээ базааж байна.
Шигшээ багийн бүрэлдэхүүнд: Б.Бату, М.Чинзолбоо, Л.Бодьхүү, Б.Билгүүн, Б.Энхбат, Э.Мөнхзаяа, Г.Мөнхтулга, Э.Энх-Амгалан, Э.Ариунбилэг, Б.Батбаясгалан, М.Батбаатар, Э.Энхсүх, У.Цэнгэл, У.Нямдаваа, Б.Содбилэг, Э.Амартөр, Э.Энххүслэн, Д.Лхагвадорж, Н.Жадамба, А.Билгүүн нар багтжээ.
Монголын шайбтай хоккейн баг тамирчид өнгөрсөн хоёр жил дараалан IV дивизоны ДАШТ-д амжилттай оролцож, 2023 онд мөнгө, 2024 онд алтан медаль хүртэн, III дивизонд дэвшин оролцох эрхээ авсан юм. Энэ удаагийн тэмцээн нь Монголын хоккейчдын хувьд олон улсын түвшинд илүү өндөр түвшний өрсөлдөөнд оролцох анхны сорилт болж байна.
Эх сурвалж: Монголын хоккейн холбоо
Сэтгэгдэл (2)