Олон улсын эрх зүйн хөгжлийн байгууллагын Монгол дахь суурин төлөөлөгчийн газар, Европын Холбооны Монгол дахь төлөөлөгчийн газрын санхүүжилтээр “Шүүх эрх мэдлийн байгууллагын хамтын ажиллагаа ба ил тод байдал” (2024-2026) төслийг Шүүхийн ерөнхий зөвлөлтэй хамтран хэрэгжүүлж байна.
Төслийн хүрээнд Монгол Улсад шүүхийн үйлчилгээг сайжруулах зорилгоор шүүхийн байранд иргэдэд зөвлөн туслах эрх зүйн хөтөчийг туршилтаар ажиллуулж эхэлжээ.
Эрх зүйн хөтөчийн үүрэг:
- Нэхэмжлэл бичих заавар өгөх
- Шаардлагатай баримт бичгийн талаар тайлбарлах
- Тусгай журмаар хэрэг хянан шийдвэрлэх ажиллагааны талаар зөвлөгөө өгөх
- Улсын тэмдэгтийн хураамж тооцох, төлөхөд туслах
- “Гэрэгэ киоск” машиныг ашиглах аргачлал заах
- Нэхэмжлэл хуваарилагдсан шүүгч, туслахтай холбоотой мэдээлэл өгөх
- Шүүхийн архиваас лавлагаа, тодорхойлолт авахад туслах
Энэхүү туршилтыг 2024 оны 2 дугаар сарын 24-нөөс эхлүүлсэн бөгөөд 17 хөтөч дөрвөн багт хуваагдан 4 дүгээр сар хүртэл ажиллах юм.
Шүүхийн байранд иргэдийн 50 гаруй хувь нь нэхэмжлэл гаргах, хаана ямар шүүхэд хандах, хэргийн шийдвэрлэлтийн явцын талаар мэдээлэл авах зэрэг асуудлаар хөтөчдөд хандсан байна.
Холбогдох албаныхны онцолсноор эрх зүйн хөтөч ажиллуулснаар шүүхийн мэдээлэл лавлагааны мэргэжилтнүүдийн ажлын ачаалал буурч, иргэдийн сэтгэл ханамж нэмэгдэн, шүүхийн үйлчилгээний хүртээмж сайжирсан эерэг үр дүн ажиглагдаж байна.
Эх сурвалж: Шүүхийн ерөнхий зөвлөл
