Монгол Улсаас Бүгд Найрамдах Польш Улсад суух Онц бөгөөд Бүрэн эрхт Элчин сайд Н.Оюундарь энэ сарын 7-нд Польш Улсын Ерөнхийлөгч Анджей Дудад Итгэмжлэх жуух бичгээ өргөн барив.
Энэ үеэр Элчин сайд Монгол Улсын Ерөнхийлөгч У.Хүрэлсүхийн мэндчилгээг Ерөнхийлөгч А.Дудад уламжилж, Монгол Улсын төрийн тэргүүний хийх төрийн айлчлал амжилттай хэрэгжинэ гэдэгт итгэл төгс байгаагаа илэрхийлэв. Тэрбээр Монгол, Польшийн харилцаа зөвхөн дипломат харилцаа тогтоосон 75 жилээр хязгаарлагдахгүй, олон зуун жилийн түүхтэй болохыг онцолжээ.
Талууд хоёр орны хамтын ажиллагааг улс төр, батлан хамгаалах, худалдаа, эдийн засаг, боловсрол, соёл, шинжлэх ухаан, хөдөө аж ахуй, эрүүл мэнд, уул уурхай, палеонтологи болон бусад салбарт өргөжүүлэх талаар санал солилцлоо.
Мөн Монгол Улс 2026 онд НҮБ-ын Цөлжилттэй тэмцэх тухай конвенцын Талуудын 17 дугаар бага хурлыг Улаанбаатар хотноо зохион байгуулах хүрээнд Польш улстай хамтран ажиллах боломжийг хэлэлцсэн байна.
Польш Улсын Ерөнхийлөгч Анджей Дуда Элчин сайд Н.Оюундарийг томилогдсонд нь баяр хүргэж, Монгол, Польшийн ижил төстэй түүхэн замнал, нийтлэг үнэт зүйлс-ийг онцлон хоёр орны харилцааг өргөжүүлэхэд бүх талын дэмжлэг үзүүлэн ажиллахад бэлэн байгаагаа илэрхийллээ.
Эх сурвалж: Монгол Улсаас БНПУ-д суугаа Элчин сайдын яам
