Италийн Турин хотод болж буй Тусгай олимпын дэлхийн өвлийн наадам дөрөв дэх өдрөө үргэлжилж байна. Энэхүү тэмцээнд 103 орны 1500 тамирчин спортын найман төрөлд өрсөлдөж буй бөгөөд манай улсын баг тамирчид өнөөдрийн байдлаар нэг алт, нэг мөнгө, хоёр хүрэл медаль хүртээд байна.
Уулын цанын төрөлд А.Азжаргал алтан медаль хүртэж, Монгол Улсын төрийн дууллыг Туринд эгшиглүүллээ. Энэ нь манай улсын Тусгай олимпоос хүртэж буй гурав дахь алтан медаль юм. Өмнө нь 2017 онд монгол тамирчид хоёр алтан медаль хүртэж байсан бол найман жилийн дараа дахин энэ амжилтаа ахиуллаа.
Снөүбоардын жиант слаломын төрөлд хүрэл медаль хүртсэн А.Алтан-Очир өчигдөр өөр нэг төрлөөр оролцож, амжилтаа ахиулан мөнгөн медаль хүртэв. Ингэснээр тэрбээр Турины Тусгай олимпын наадмаас хоёр медаль хүртээд байна.
Түүнчлэн медалийн болзол хангахад ойрхон байсан М.Энхзаяа амжилтаа ахиулж, хүрэл медаль хүртлээ.
Манай тамирчдын тэмцээн гүйлтийн цана, цасны гуталтай гүйлт, бүжиг, бөмбөгтэй заалны хоккейн төрлүүдээр цааш үргэлжилнэ.
