"Бид Украиныг дэмжинэ, мөн Европ тивд энх тайван, аюулгүй байдлыг хангах үүргээ биелүүлэх болно" гэж Францын Ерөнхийлөгч Эммануэл Макрон лхагва гарагт болсон албан бус дээд хэмжээний уулзалтын дараа мэдэгдсэн байна.
Уулзалтад Литва, Финланд, Кипр, Бельги, Болгар, Канад, Хорват, Эстони, Грек, Ирланд, Исланд, Латви, Норвеги, Португал, Швед, Словени, Чех улсын төр, засгийн тэргүүн нар дүрс бичлэгээр холбогдож оролцжээ. Харин Э.Макроноос гадна Румыний Ерөнхийлөгчийн үүрэг гүйцэтгэгч Илие Боложан, Люксембургийн Ерөнхий сайд Люк Фриден нар уулзалтад биечлэн оролцсон байна.
Э.Макрон Украин энх тайвныг тогтоох үйл явцад зайлшгүй оролцох ёстой бөгөөд тус улсын бүрэн эрхт байдлыг хүндэтгэх ёстой гэж мэдэгдсэн байна. Түүнчлэн Европын орнууд аюулгүй байдалдаа санаа зовниж байгааг харгалзан үзэх ёстойг онцолжээ.
Долоо хоногийн дотор болсон хоёр саммит
Украин болон Европын аюулгүй байдлын асуудлаарх анхны яаралтай дээд хэмжээний уулзалт Мюнхений аюулгүй байдлын бага хурал өндөрлөсний маргааш буюу хоёрдугаар сарын 17-нд Францын Ерөнхийлөгчийн санаачилгаар зохион байгуулагдсан.
Парисын уулзалтад оролцогчид:
- Украинд аюулгүй байдлын баталгаа олгох асуудал
- Европын орнуудын батлан хамгаалахын зардал
- Украины дайныг зогсооход чиглэсэн АНУ-ын шинэ засаг захиргааны хүчин чармайлт зэрэг асуудлуудыг хэлэлцсэн байна.
Гэсэн хэдий ч Румын, Чех зэрэг Европын Холбооны хэд хэдэн орны удирдагчдыг Э.Макрон эхний уулзалтад уриагүйд тэд дургүйцлээ илэрхийлжээ. Үүний улмаас хоёрдугаар сарын 19-нд Парист өргөтгөсөн хэлбэрээр шинэ дээд хэмжээний уулзалт зохион байгуулсан байна. Харин Германы Канцлер Олаф Шольц энэ удаагийн уулзалтад оролцоогүй аж.
Эх сурвалж: DW
