Туркийн Ерөнхийлөгч Режеп Тайип Эрдоган мягмар гарагт хийсэн мэдэгдэлдээ Украины бүрэн эрхт байдал, газар нутгийн бүрэн бүтэн байдлыг хүндэтгэсээр байх болно гэдгээ онцолж, Оросын оролцоотой энхийн хэлэлцээг хийхэд хамгийн тохиромжтой улс нь Турк гэдгийг дурдсан байна.
Турк болон АНУ-ын дипломат санаачилга
Украин, Оросын дайныг зогсоох чиглэлд АНУ-ын Ерөнхийлөгч Дональд Трампын гаргасан дипломат санал нь Туркийн урьд өмнө баримталж ирсэн бодлоготой нийцэж байгаа тухай Р.Эрдоган Украины Ерөнхийлөгч Владимир Зеленскийтэй Анкара хотноо хийсэн уулзалтын дараах хэвлэлийн хурлын үеэр хэлжээ.
В.Зеленский энхийн хэлэлцээрт байр сууриа илэрхийлэв
Украины Ерөнхийлөгч В.Зеленский Саудын Арабт төлөвлөсөн айлчлалаа гуравдугаар сарын 10-ны өдөр болгон хойшлуулсан гэдгээ мэдэгдсэн бөгөөд Украины оролцоогүйгээр дайныг зогсоох асуудлыг хэлэлцэх боломжгүй гэдгийг онцлон дурдсан байна.
Тэрбээр, шударга энх тайван тогтоохын тулд Украинд аюулгүй байдлын баталгаа өгөх асуудлыг АНУ, Украин болон Европын орнууд хамтран хэлэлцэх ёстой гэдгийг цохон тэмдэглэжээ.
АНУ Украины асуудлаар дипломат шугамаар идэвхтэй ажиллаж байна
АНУ-ын Ерөнхийлөгчийн Украины асуудал хариуцсан тусгай төлөөлөгч мягмар гарагийн орой Киевийг зорьсон талаар "Reuters" агентлаг эх сурвалжийг эш татан мэдээлжээ.
Эх сурвалж: VOA
