Засгийн газрын ээлжит хуралдаан 2025 оны хоёрдугаар сарын 12-нд болж, хэд хэдэн асуудлыг хэлэлцэн шийдвэрлэлээ.

“Монголын төмөр зам” ТӨХК болон “Тавантолгой төмөр зам” ХХК-иудын 2024 оны цэвэр ашиг, 2025 оны хөрөнгө оруулалтаар, дотоодын нөөц бололцоонд тулгуурлан Багахангай-Хөшигийн хөндийн салбар төмөр замыг санхүүжүүлэхийг холбогдох байгууллагуудад зөвшөөрөв.

Тус төмөр замыг холбогдох хууль тогтоомж, олон улсын стандарт, чанарын шаардлагад нийцүүлэн барьж байгуулах, ашиглалтыг “Монголын төмөр зам” компани хариуцах юм. Энэхүү төмөр зам нь Улаанбаатар төмөр замын Багахангай өртөөнөөс салаалж, Төв аймгийн Сэргэлэн сумын нутгаар дайран Хөшигийн хөндий хүртэл 87.2 км, Хөшигийн хөндий-Шувуун фабрикийн чиглэлд 15.6 км, нийт 102.8 км урт үргэлжлэхээр төлөвлөгджээ. Төмөр замыг гурван өртөө, дөрвөн зөрлөгтэй байхаар тооцон, төслийг хоёр үе шаттай хэрэгжүүлэх аж.

Мөн төмөр замын суурь бүтэц, инженерийн байгууламж, эрчим хүч, ус хангамж, өртөө, зөрлөг болон бусад шаардлагатай барилга байгууламжийг барихад шаардагдах техникийн нөхцөл, зөвшөөрлийг тухай бүрд шуурхай олгохыг холбогдох албан тушаалтнуудад үүрэг болгосон байна.

Эх сурвалж: Засгийн газрын Хэвлэл мэдээлэл, олон нийттэй харилцах газар