Бундестагийн ээлжит бус сонгуулийн дүнгээр Канцлераар томилогдсон тохиолдолд тус улсын эдийн засаг, цагаачлалын бодлогод мэдэгдэхүйц өөрчлөлт оруулна гэж Христийн Ардчилсан холбоо намын дарга Фридрих Мерц амлалаа. Тэрбээр өнгөрөгч бямба гарагт Bild am Sonntag сонинд ярилцлага өгөх үеэрээ энэ талаар мэдэгдсэн байна.
Ф.Мерцийн онцолсноор Германы эдийн засгийн өсөлтийг хангах, хөдөлмөр эрхлэлтийг дэмжих, дотоодын аюулгүй байдлыг сайжруулахын зэрэгцээ орогнол хүссэн цагаачдын урсгалыг хязгаарлах шаардлагатай болжээ.
Холбогдох асуудлаар Христийн Ардчилсан холбоо (CDU) болон Христийн нийгмийн холбоо (CSU) намуудын хамтарсан санал болгосон “Цагаачлалын талаарх хууль тогтоомжийг чангатгах тухай” тогтоол нэгдүгээр сарын 29-нд Бундестагаар дэмжигдсэн байна.
Цагаачлалын бодлого тойрсон маргаан
Саяхан Магдебург, Ашаффенбург хотуудад хүний аминд хүрсэн халдлагууд гарсны дараа консерватив намууд цагаачлалын бодлогыг чангатгахыг шаардах болсон юм. Тогтоолын төслийг Чөлөөт ардчилсан намын депутатууд болон барууны үзэлтэй “Германы төлөөх өөр сонголт” намын гишүүд дэмжжээ.
Харин Германы Социал-демократ нам болон “90-ийн холбоо/Ногоон нам” эвслийнхэн энэхүү санаачилгыг эсэргүүцэж, цагаачдад орогнол хайх эрхийг зөрчиж байна гэж мэдэгдсэн байна.
Нэгдүгээр сарын 31-нд Германы парламентын гишүүд “цагаачлалыг хязгаарлах тухай” хуулийн төслийг багахан саналаар хүлээж аваагүй юм. Уг төсөлд “эрх баригчдын шийдвэрээр тус улсаас гарч явах ёстой гадаадын иргэдийг Германы цагдаа нар албадан гаргаж болно” гэсэн заалт багтаж байсан аж.
Сонгуулийн өмнөх улс төрийн тэмцэл
Барууны үзэлтэй намуудын хамтын ажиллагаа зүүний улс төрийн хүчнийхний дургүйцлийг төрүүлж, сүүлийн өдрүүдэд Германы хэд хэдэн хотод Христийн Ардчилсан холбоо болон “Германы төлөөх өөр сонголт” намуудын хамтын ажиллагааг эсэргүүцсэн жагсаалууд болж байна. Гэсэн хэдий ч Ф.Мерц энэ мэдээллийг үгүйсгэжээ.
Германы парламентын ээлжит бус сонгууль хоёрдугаар сарын 23-нд зохион байгуулагдах бөгөөд түүнд улс төрийн 29 нам өрсөлдөх юм.
Эх сурвалж: DW
