АНУ-ын ерөнхийлөгчийн сонгуульд Ардчилсан намаас нэр дэвшигч, дэд Ерөнхийлөгч Камала Харристай мэтгэлцэхгүй гэж Ерөнхийлөгч асан Дональд Трамп лхагва гарагт мэдэгджээ. Fox News телевиз 10 дугаар сарын 24-нд эсвэл 27-нд болох хоёр дахь мэтгэлцээнд оролцохыг урьснаас хэдхэн цагийн дараа Бүгд найрамдах намаас нэр дэвшигч ийнхүү мэдэгджээ.
Д.Трамп, К.Харрис нар есдүгээр сарын 10-нд анх удаагаа халз мэтгэлцсэн юм. Д.Трампын хувьд ирэх 11 дүгээр сард болох сонгуулийн өмнө дахин мэтгэлцээн болохгүй хэмээн мэдэгдсээр иржээ. Улмаар тэрбээр 10 дугаар сарын 23-нд мэтгэлцээн зохион байгуулах CNN телевизийн урилгад татгалзсан хариу өгсөн бол К.Харрис хүлээн авчээ.
11 дүгээр сарын 5-нд болох сонгуулийн үеэр Д.Трамп, К.Харрисын хооронд ширүүхэн өрсөлдөөн өрнөх төлөвтэй байгааг санал асуулгын дүнгүүд харуулж байгаа юм. Fox News мэдэгдэхдээ, хоёр дахь мэтгэлцээн нь “нэр дэвшигч нарт эцсийн үндэслэл дүгнэлтээ хэлэх боломжийг олгоно” гэсэн байна. Өнгөрсөн долоо хоногт дэд ерөнхийлөгчид нэр дэвшигчид болох Миннесота муж улсын захирагч Тим Уолз, АНУ-ын сенатч Ж.Д.Вэнс нар мэтгэлцсэн юм.
Д.Трамп “Truth Social” нийгмийн сүлжээний хуудсандаа “Мэтгэлцэх зүйл байхгүй тул дахин мэтгэлцээн болохгүй” гэж бичсэн байна. Тэрбээр мөн одоо мэтгэлцэхэд хэтэрхий оройтсон гэдгийг дурджээ. Д.Трамп өнгөрсөн зургаадугаар сарын сүүлчээр тухайн үед Ардчилсан намаас ерөнхийлөгчийн сонгуульд нэр дэвшиж байсан, АНУ-ын Ерөнхийлөгч Жо Байдентай халз мэтгэлцсэн билээ.
Уг мэтгэлцээнээс хойш сар хүрэхгүй хугацааны дараа Ж.Байден өрсөлдөөнөөс нэрээ татсан юм. Мэтгэлцээний дараа Д.Трамп Ж.Байденыг илүүрхэж байсан боловч К.Харрис сонгуульд нэрээ дэвшүүлснээр өрсөлдөөн ширүүсэж, зарим санал асуулгын дүнгээр Ерөнхийлөгч асныг илүүрхэж эхэлжээ.
