Токио хотоос холгүй орших туршилтын байгууламж нь түүхий эдээр байгальд ээлтэй синтетик түлш үйлдвэрлэдэг Япон дахь анхны үйлдвэр болжээ. Ийм түлшийг арилжааны зориулалтаар үйлдвэрлэж эхэлбэл бензин болон бусад олборлодог түлшийг орлох боломжтой.
Японы нефтийн “Eneos” компани Токиогийн ойролцоох судалгааны төвдөө уг байгууламжийг байгуулж, энэ сарын эхээр ашиглалтад оруулжээ. Уг үйлдвэрт усны электролизээр дамжуулан устөрөгчийг үүсгэж, түүнийгээ агаар мандал ба үйлдвэрээс ялгарах нүүрстөрөгчийн давхар исэлтэй хольж синтетик түлш гарган авах ажээ.
Одоогоор тус компани өдөрт 160 литр синтетик түлш үйлдвэрлэхээр төлөвлөж байна. Шингэн түлш нь нүүрстөрөгчийг бараг ялгаруулдаггүй бөгөөд дотоод шаталтын хөдөлгүүрээр ажилладаг автомашин, нисэх онгоцонд ашиглаж болно. Гэвч түүхий нефтиэс бензин, шатахуун гарган авахтай харьцуулахад өндөр байгаа үйлдвэрлэлийн өртгийг хэрхэн бууруулах вэ гэдэг асуудал тулгамдаж байна.
“Eneos Holdings” компанийн гүйцэтгэх захирал Мията Томохиде хэлэхдээ, манай компани технологио үргэлжлүүлэн хөгжүүлж, үйлдвэрлэлийн зардлыг боломжийн түвшинд хүргэн бууруулахын тулд бүх хувилбарыг турших болно гэв. Японы Засгийн газар ирэх арван жилийн эхний хагас гэхэд синтетик түлшийг борлуулж эхлэх зорилт тавьжээ.
Эх сурвалж: NHK
