Тэргүүн шадар сайд Л.Гантөмөр “Монгол Улсын хөгжлийн 2025 оны төлөвлөгөө батлах тухай” УИХ-ын тогтоолын төслийг өнгөрөгч баасан гаригт УИХ-ын дарга Д.Амарбаясгаланд өргөн барьжээ.

Хамтарсан Засгийн газарт багтсан гурван намын байгуулсан “Хурдтай хөгжлийн төлөөх зориг” нэртэй гэрээнд үндэслэсэн “Монгол Улсын хөгжлийн 2025 оны төлөвлөгөө”-нд эь дэд бүтэц, бүтээн байгуулалтын 14 мега төсөл, тогтвортой хөгжлийг хурдасгах 149 төсөл хөтөлбөр багтсан юм гэнэ. Урт хугацааны тогтвортой хөгжлийн суурь дэд бүтцийг бий болгох 14 мега төслийг 2025 онд багтааж бүрэн эхлүүлэхээр тогтоолын төсөлд тусгажээ.

Сануулахад, дээрх 14 мега төслийн нийт өртөг нь 43 их наяд 220 тэрбум төгрөг. Монгол Улсын ДНБ-ээс хоёр дахин, Улсын нэгдсэн төсвөөс гурав дахин том тоо. Өнгөрсөн найман жилд МАН-ын амласан бүх амлалтуудыг хэд дахин нугалсан тоо.

Дээр нь эдгээр төслүүдийг хэрэгжүүлэгч буюу харьяалсан сайд нар нь дандаа АН-аас томилогдсон нөхөд байгаа. Тэр тусмаа МАН-ын гишүүд, сайд нар "Хамгийн их төсөвтэй яамдаа АН-ынханд өгчихлөө. Өрмийг тэд хамаад өөрсдөө хусмыг нь долооход хүрэв" хэмээн бухимдаж, өдөр өнжихгүй намын дарга нараа ээрч муурч, нэг танхимынхаа сайд нарын улыг нь ухаж яваа. Тиймээс хамтарсан Засгийн газар хэр удаан наслахыг таахад бэрх юм. 

Хоёрдугаарт, МАН-ын дарга Л.Оюун-Эрдэнэ хамтарсан Засгийн газрыг анх байгуулахдаа "Эдийн засгийн хөгжлийн бодлогыг АН-д өгч, нийгмийн хамгааллын бодлогоо МАН хэрэгжүүлнэ ээ" гэж амласан. Товчхондоо, АН-ын сайд нар төсвөө бүрдүүлнэ, МАН-ынхан түүнийг нь хуваарилна аа л гэсэн үг.

Сая орон нутгийн сонгуулийн өмнө малчдад амласан "Шинэ хоршоо"-ны нэг их наяд төгрөгөөс эхлээд мөнгө нь ороод ирвэл үрж ядах асуудалгүй. Харин манай АН-ын сайд нар "Монгол Улс мөнхийн эвслийн Засгийн газартай боллоо. Хоёр нам хамтарч бодлогоо хэрэгжүүлнэ" гээд хөл газар хүрэхгүй агаарт нисч яваа. Ингэхэд "мөнхийн эвсэл" гэдэг чинь "АН-тай л эвсэнэ" гэсэн үг бас биш шүү дээ. АН-ыг хөөгөөд гаргахад ард нь зөрөөд орж ирэх нэг бус нам, эвсэл байгаа. Хоёр сайдын суудал өгөөд амыг нь барина. Харин манай АН-ын нөхдүүд баахан ТЭЗҮ хийсэн, мөнгө идсэн хэрэгтэй шоронгийн хаалга татах вий дээ.

Өмнөх, хойдохоо харсан ч тэр, МАН-ын хийж чаддаг ганц ажил тэр шүү дээ. "Гарын үсэг зурсан сайд нь тэр байна" гэж хэлээд л ачуулна. Өнгөрсөн хугацаанд ажил хийсэн, хийх гэсэн АН-ын бүх сайд нар ял авсан. Одоо ч гэсэн хормойнд нь гал асчихсан нэг хоёр сайд харайж л явна. Мөнгө гэдэг чинь тийм л идтэй, шидтэй эд...