ХӨСҮТ-өөс өнгөрсөн нэг хоногт улсын хэмжээннд хийсэн коронавирусын шинжилгээний хариуг танилцууллаа.
ХӨСҮТ-ийн Тандалт, судалгааны албаны дарга Ж.Байгалмаа:
-“Сүүлийн 24 цагийн хугацаанд 13057 хүнд шинжилгээ хийснээс 321 шинэ тохиолдол бүртгэгдэж, нийт батлагдсан тохиолдлын тоо 7014 боллоо.
Өнгөрсөн нэг хоногт 104 тохиолдол эдгэрч, эдгэрч эмнэлгээс гарсан хүний тоо 4341 болсон байна.
Сүүлийн 24 цагт бүртгэгдсэн 321 тохиолдлын 262 нь Улаанбаатар хотод бүртгэгдсэн. Нийслэлд бүртгэгдсэн нийт халдварын тоо 5868 болж байна. Орон нутагт шинээр 59 тохиолдол бүртгэгдэж, нийт 610 тохиолдол болсон байна" гэв.
Сүүлийн 24 цагт орон нутагт бүртгэгдсэн шинээр бүргэгдсэн 59 тохиолдол:
- Дархан-Уул 10
- Баянхонгор 7
- Архангай 19
- Өвөрхангай 8
- Орхон 10
- Говьсүмбэр 2 байна.
Дээрх мэдээллийн дараа ХӨСҮТ-ийн Тандалт, судалгааны албаны дарга Ж.Байгалмаа сэтгүүлчдийн асуултанд хариуллаа.
-Орон нутагт халдвар авсан хүмүүсийг хэрхэн эмчилж байна вэ? ХӨСҮТ-өөс эмч нар очиж ажиллаж байгаа юу?
-Орон нутагт байгаа хүмүүст стандартын дагуу эмчилээ үйлчилгээ үзүүлж байгаа. Зарим аймгаас мэргэжлийн баг ирүүлэх хүсэлт гаргасан. Завхан аймгийн Шилүүстэй суманд амжилттай эмчилгээ, үйлчилгээ үзүүлээд байна. Тэнд Завхан аймгийн эмч, эмнэлгийн ажилчид төдийгүй ХӨСҮТ-ийн эмнэлзүй, тархвар судлаач эмч нар очсон. Мөн Өвөрхангай аймагт мэргэжлийн баг илгээгээд байна.
Ер нь аймаг, орон нутгийн эмнэлгүүд бэлтгээ сайн хангасан учраас өөрсдөө тодорхой хэмжээнд тусламж үйлчилгээ үзүүлэх бололцоотой байгаа.
-Цаашид орон нутагт халдварын тоо нэмэгдсэн тохиолдолд тэнд нь эмчлэх нөөц боломж, эмч нарын хүрэлцээ хэр байна вэ?
-Сүүлийн 24 цагийн байдлаас харахад Дархан-Уул, Архангай аймгуудад халдварын тоо маш өндөр байна. Эдгээр аймгуудад халдварын тоо нэмэгдэж байгаа ч хариу арга хэмжээг маш сайн авч байгаа. Тусгаарлах байрны нөөцийг бэлдэж, тэндээ батлагдсан тохиолдлын ойрын хавьтлуудыг авч байна. Эмнэлгийнхээ нэмэлт орны нөөцийг тооцоолж, шаардлагатай тохиолдолд дэлгэхээр бэлдэж байгаа.
-"Сэмжид Хужирт" сувиллын газраас халдвар тарсан. Энэ сувилалтай холбоотой хэдэн аймагт, хэдэн тохиолдол бүртгэгдээд байна вэ?
-"Сэмжид Хужирт" сувилалд энэ сарын 1-25-ны хооронд 13 аймгийн 174 иргэн амарсан. Өчигдрийн байдлаар 62 хүнээс халдвар илэрч, ойрын хавьтлуудыг тусгаарлалтад авсан. Орон нутгууд хяналтаа тавьж байгаа.
