Эрүүл мэндийн яамнаас зохион байгуулдаг ээлжит хэвлэлийн бага хурлын үеэр дэлхийн улс орнуудаас коронавирусын эсрэг авч байгаа арга хэмжээний талаар ЭМЯ-ны Гадаад харилцаа, хамтын ажиллагааны хэлтсийн дарга Б.Янжмаа танилцууллаа. 

Өнгөрсөн 24 цагийн дотор Шинэ Зеланд улсад халдварын тоо 30 орчим хувиар нэмэгдэж, улсын хэмжээнд хөл хорио тогтоожээ. Шинэ Зеландын Эрүүл мэндийн сайд "Халдварын  тоо сүүлийн 14 хоногт өсөх магадлалтай байгаа тул зайнаас харьцаж, халдварын тархалтыг бууруулах боломжтой" гээд эрүүл мэндийн байгууллагуудаас өгч байгаа зөвлөмж, хорио цээрийн дэглэмийг сайтар сахихыг иргэдээсээ хүссэн байна. 

Австрали улс мөн зайнаас харьцах шаардлагаа чангатгаж, 4 метр квадратад нэг  хүн ногдох байдлаар зай барьж харьцахыг анхааруулсан байна. Халдварын нөхцөл байдал дахиад зургаан сар үргэлжлэх төлөвтэй, эмнэлгийн ор, эрчимт эмчилгээний тасаг хүрэхгүй байгааг мөн мэдээлжээ.

АНУ-д сүүлийн өдрүүдэд халдварын тохиолдлын тоо эрчимтэй өсч, нас барсан хүмүүсийн тоо нэмэгдсээр байна. ДЭМБ-аас мэдээлснээр шинээр бүртгэгдсэн халдварын 85 хувь нь европийн бүс болон АНУ-д ногдож байгаа бөгөөд АНУ халдварын голомтын цөм болж болзошгүйг анхааруулсан байна.

Зарим улсад эмнэлгийн ачааллыг нэмэгдүүлэхгүй байх, халдвар хамгааллын хувцсыг дутаахгүйн тулд  яаралтай бус, амь насны заалтгүй төлөвлөгөөт  мэс ажилбаруудыг цуцлах шийдвэр гаргаж эхэлсэн байна. Өнөөдрийн байдлаар дэлхийн 2.5 тэрбум хүн шинэ коронавирусийн халдварын улмаас хөдөлгөөний хязгаарлалтад орсон байна.

Халдвар эрчимтэй тархаж буйтай холбогдуулан ДЭМБ-аас "зайнаас харьцах" гэдэг нэг л мессежийг өгч байж, халдварын гинжин хэлхээг тасалж чадна гэдгийг анхааруулж байна.