Мэргэжлийн сүмогийн Изүцү дэвжээний ояката, сэкивакэ асан Сакахоко өнгөрөгч есдүгээр сарын 16-нд өвчний учир таалал төгссөн билээ. Тэрээр сүмо бөхийн холбооны тойргийн барилдаан хариуцсан хэсэгт дэд тэргүүний алба хашиж байжээ. Тамирчин байх хугацаандаа гарамгай барилдааны шагналыг тав, уран барилдааны шагналыг дөрөв, Таканосато, Чиёонофүжи, Фүтахагүро аваргуудаас долоон кинбоши авч байсан аж.
58 насандаа нас барсан түүний хамгийн том цолтой бөх нь их аварга Какүрюү М.Ананд юм. Изүцү дэвжээний ояката, сэкивакэ асан Сакахоко нас барснаар тус дэвжээ багшгүй болж тус дэвжээний бөхчүүд Мичинокү дэвжээнд шилжин барилдаж байгаа. Сумо бөхийн холбооноос багшгүй болсон Изүцү дэвжээг хааж, бөхчүүдийг нь өөр дэвжээнд шилжүүлэх шийдвэр гаргасан байна.
Сумогийн их аварга Какүрюү М.Ананд дэвжээгээ өвлөн авахын тулд Монгол Улсын иргэншлээс татгалзаж, Япон Улсын иргэн болох хүсэлтээ Монгол Улсын төрийн байгууллагуудад гаргажээ. М.Ананд аваргын хувьд Япон Улсын иргэншлийг сонгосон сумо бөхийн дөрөв дэх их аварга болж байна.
Түүнээс өмнө Монгол Улсаас сэкивакэ Кёкүтэнхо Н.Цэвэгням, Асасэкирю Б. Дашням, Хакүхо М.Даваажаргал нар тус улсын иргэншил авсан билээ.
