Монгол Улсын Засгийн газраас зохион байгуулж буй “Нээлттэй хаалганы өдөр” Сүхбаатарын талбайд үргэлжилж байна. Өнөөдөр /2019.09.19/  Цагдаагийн Ерөнхий газрын /ЦЕГ/ Бүртгэл хяналтын төвөөс жолооны үнэмлэх нөхөн олгох, солих, лавлагаа зэргийг өдөрт нь хэвлэж өгч байна. Мөн энэ үеэр Улсын бүртгэлийн ерөнхий газраас хаяж үрэгдүүлсэн иргэний үнэмлэхийн захиалгыг 08.30-14.00 цагийн хооронд хүлээн авч, өдөрт нь хэвлэн 16.00 цагт буцаан олгоно. 

2018 онд жолооны үнэмлэхийн бэлдэцийн хомсдол болон тендерийн асуудалтай холбоотойгоор жолооны үнэмлэх хугацаандаа олгогдоогүй. 2018 онд хуримтлагдсан жолооны бүх үнэмлэхийг энэ жил хэвлэж тараасан бөгөөд өнөөдрийн байдлаар 30 мянган жолооны үнэмлэх эзнээ хүлээж байна. Нийслэл хотын хэмжээнд жолооны үнэмлэхээ хаяж гээгдүүлсэн, хугацаа дууссан гэх шалтгаанаар өдөрт 300 хүн ханддаг байна.

2019 оноос эхлэн “Монгол шуудан” ХК-тай хамтран иргэд жолооны үнэмлэхээ хаяж гээгдүүлсэн, солиулах шаардлагатай тохиолдолд жолооны үнэмлэхийг гэрийн хаягаар хүргэх үйлчилгээ нэвтэрчээ.

Тодруулбал, үнэмлэхээ хаяж, гээсэн, үрэгдүүлсэн, хугацаа дууссан үнэмлэхээ дахиж авахаар захиалсан иргэдийн үнэмлэхийг “Монгол шуудан” ХК-иар  дамжуулан хүссэн хаягаараа хүргүүлэх боломжтой болсон байна. Хаягаар хүргүүлэхийн тулд ЦЕГ-ын бүртгэл хяналтын төвд үнэмлэхээ захиалах үедээ шуудангаар хүргүүлэх захиалгын хуудас бөглөөд хаягийн мэдээллээ өгсөн тохиолдолд тэр хаягийн дагуу хүргэлт хийгдэх юм байна.