2017 онд Эрүүл мэндийн даатгалын тухай хуульд өөрчлөлт оруулан “магадлан итгэмжлэгдсэн спортын клубт идэвхтэй хөдөлгөөн хийж, спортоор хичээллэх үйлчилгээнд урамшуулал олгох”-оор тусгасан. Уг хуулийн өөрчлөлт энэ оны 1-р сарын 1-нээс хэрэгжиж эхэлсэн юм.

Хэдийгээр 1-р сарын 1-нээс хэрэгжих байсан ч судалгаа тооцоо, дагаж мөрдөх журам зэргийг боловсруулж өдийг хүрчээ. Харин өнгөрсөн сард БСШУСЯ болон Эрүүл мэндийн сайд журмыг баталж, холбогдох байгууллагуудад хүргүүлжээ. 

Иргэд эрүүл мэндийн даатгалаараа үйлчлүүлэх газар нь зөвхөн фитнесс клубээр хязгаарлагдахгүй ба Иог, таеквондо, сагс, усан сэлэлт, жүдо, хөлбөмбөг, теннис гээд бүх төрлийн спорт клубуудад эрүүл мэндийн даатгалаараа үйлчлүүлэх боломжтой юм.

Харин эдгээр клубүүд нь заавал магадлан итгэмлэгдсэн спорт клубүүд байх ёстой аж.

БСШУСЯ-ны биеийн тамир, спортын бодлогын газрын дарга Э.Мөнхбилэг “2019 оны гуравдугаар сарын 29-нд БСШУС-ын сайд болон ЭМ-ийн сайд нарын хамтран гаргасан тушаалаар спорт клубийн магадлан итгэмжлэх журам батлагдсан. Иргэд спорт клубүүдийн магадлан итгэмжлэлийг зөвхөн фитнес, иогийн клубүүдэд хийж байгаа гэж ташаа ойлгоод байгаа. Энэ журам бол бүхий л спортын клубүүдийг магадлан итгэмжлэх журам юм” хэмээн онцоллоо. 

Спорт клубүүдийг магадлан итгэмжлэхдээ хэд хэдэн шалгуур тавина. Үүнд, хуулийн этгээдийн гэрчилгээтэй байх, сүүлийн 2 жилийн санхүүгийн тайланг аудитаар баталгаажуулсан байх, нийгмийн даатгал төлсөн, үйл ажиллагаа явуулах орчин, эрүүл ахуйн стандартыг хангасан байх, дасгалжуулах эрхтэй багш нартай байх зэрэг хамаарна.

Түүнчлэн журам батлагдсан тул БСШУСЯ-ны харьяа Биеийн тамир спортын газар санал гаргасан клубүүдийг бүртгэж, шалгаруулах ёстой юм. Үүний дараа ЭМДЕГ баталсан төсөвтэй тааруулж шалгаруулах юм байна.

Энэ жил иргэдийг ЭМД-аараа спорт клубүүдэд хичээллэхэд зориулж 2 тэрбум төгрөг төсөвлөсөн байна. Эх сурвалжийн хэлж байгаагаар иргэд ЭМД-аараа энэ зунаас эхэлж спорт клубүүдэд хамрагдах боломжтой болох юм.