АШУҮИС-ийн дэргэдэх Япон-Монголын Сургалтын эмнэлгийг ашиглалтад хүлээн авах ёслол өнөөдөр боллоо. 

Тус эмнэлгийн барилгыг өнгөрсөн пүрэв гаригт буюу гуравдугаар сарын 28-нд Нийслэлийн ОБЕГ, МХЕГ, Ус сувгийн удирдах газар, УБЦТС, Харилцаа холбоо мэдээллийн төв гэх мэт 10 гаруй мэргэжлийн байгууллагын улсын комиссын 40 гишүүний 100 хувийн саналаар эмнэлгийн барилгыг хүлээж аваад байна. 

Эмнэлгийн найдвартай үйл ажиллагааг хангаж, чанартай эмнэлгийн тусламж үйлчилгээг үзүүлэхийн тулд эмнэлгийг шат дараатай ашиглалтад оруулах аж. Эхний шатанд буюу 2019 оны зун, амбулаторийн дотрын тасгуудыг ашиглалтад оруулж, эмнэлзүйн үйлчилгээг эхлүүлнэ. Харин хоёр дахь шатанд мэс заслын тасаг болон хэвтэн эмчлүүлэх тасагт өвчтөн авч эхэлнэ. Хамгийн сүүлд нь яаралтай тусламжийн тасгийн үйлчилгээг эхлүүлхээр төлөвлөсөн байна.

"Сургалтын эмнэлэг" ашиглалтад орсноор япон стандарт хангасан чанартай, өндөр түвшний эмнэлгийн тусламж үйлчилгээг аюулгүй үзүүлэх боломж бүрдэж эхэллээ.

Монголд анх удаа байгуулсан Их сургуулийн эмнэлэг нь 104 ортой, дэвшилтэт технологи, өндөр түвшний эмнэлгийн тусламж үйлчилгээг үзүүлэх төдийгүй яаралтай тусламж үйлчилгээ, Монголд эмчлэгдэх боломжгүйд тооцогддог 26 өвчнийг эмчлэх /зүрх, судасны өвчин эмгэг, тархины өвчин эмгэг, хавдар зэрэг/ боломж бүрдэж байна.

Мөн MRI, CT, ангиографи гэсэн шинэ дэвшилт технологийн тоног төхөөрөмжийг нэвтрүүлээд зогсохгүй “өвчтөн төвтэй эмнэлгийн тусламж үйлчилгээ”, “эмнэлгийн тусламж үйлчилгээг багаар үзүүлэх” зэрэг япон эмнэлгийн менежментийг хэрэгжүүлнэ. “Өвчтөн төвтэй эмнэлгийн тусламж үйлчилгээ” нь өвчтөнд ойр, өвчтөнд таатай байх тусламж үйлчилгээг үзүүлж, өвчтөнд дэмжлэг үзүүлэх төвийг байгуулж, эмнэлэгт хэвтэх, эмнэлгээс гарахад өвчтөн болон тэдний ар гэрт учрах ачааллыг бууруулах үйлчилгээ аж.

Нийслэлийн Засаг дарга С.Амарсайхан “Улаанбаатар хотод Олон Улсын жишигт нийцсэн эрүүл мэндийн сургалтын эмнэлэг нээгдэж байгаад нийслэлчүүдийнхээ өмнөөс сэтгэл өндөр байна. Энд суралцах боломжийг оюутан залууст олгосон, Монгол Улсын өөрчлөлт шинэчлэлтийн түлхүүрийг гартаа атгасан иргэд оршин суугчдад хөрөнгө оруулалт бүтээн байгуулалт бий болгож өгч байгаа ЖАЙКА олон улсын байгууллага, 1998 оноос хойш манай улстай стратегийн түншлэлээ хэрэгжүүлж бодитой үр дүн гаргаж байгаа Япон Улсын Засгийн газарт баярлалаа. 

Нийслэл хотод тулгардаг олон асуудал бий. Агаар хөрсний бохирдол, замын түгжрэл,  ажил, амьдралын хэмнэл болоод бусад хүчин зүйлээс шалтгаалан эрүүл мэндийн олон асуудал тулгарч байна. Бид эрүүл, боловсролтой, дэлхийд өрсөлдөх чадвартай Монгол хүнийг бэлтгэх зорилготой. Тэрхүү зорилгын нэг хэсэг нь энэ байгууламж болж байна. Энэ эмнэлгээр дамжуулан олон залуус мэргэжил боловсролтой болж, олон хүмүүст эрүүл мэндийн тусламж үйлчилгээг үзүүлж, эрүүл чадвартай залуус Монгол  Улсын салбарт бүрт очиж ажиллаж чадна. Тиймээс энд суралцах залууст болон удирдах багш ажилтнуудад улам их хариуцлага ногдож байна.

Барилга барих нэг асуудал, тоног төхөөрөмж хэрэгсэлтэй байх, ажиллах өөр хэрэг. Тэдгээрийг зүй зохистой хэрэглэх менежментийн удирдлагатай байх чухал асуудал” гэв.