/NHK/ Одоогоос 10 гаруй жилийн өмнө болсон олон улсын тэмцээнүүдийг шүүж байсан гадаадын шүүгчдэд Өмнөд Солонгосын хөл бөмбөгийн холбооноос сексийн үйлчилгээг санал болгож, бүсгүйчүүдийн биеийг үнэлүүлж байсан тухай тус улсын хэвлэлүүдэд бичиж байна. 

Тус холбоо сүүлийн үед хэд хэдэн дуулианд холбогдоод байгаа юм. Тухайлбал, 2011 ба 2012 онуудад Өмнөд Солонгост болсон хөл бөмбөгийн олон улсын 7 тэмцээний өмнө, тэдгээрийн дотор тус улсын эрэгтэйчүүдийн шигшээ баг оролцсон тоглолтын өмнө гадаадын шүүгчдэд зориулан сексийн үйлчилгээг санал болгож, зохион байгуулсан талаар Соёл, спорт, аялал жуулчлалын яамнаас явуулсан шалгалтын баримтуудад дурджээ.  

Эдгээр 7 тоглолтод оролцсон Өмнөд Солонгосын багууд 5 хожиж, 2 удаа тэнцсэн байна. Тоглолтуудыг шүүсэн хүмүүсийн дотор Японы шүүгчид байсан бөгөөд сексийн үйлчилгээний төлбөрийг дээрх холбооны зээлийн картаар хийсэн ажээ.

Өмнөд Солонгосын хөл бөмбөгийн холбооны дотор удирдлагын ил тод хангалтгүй байгааг, ялангуяа эрэгтэйчүүдийн үндэсний багийн ахлах дасгалжуулагч Хон Мён Бо-г сонгон шалгаруулахад ил тод байдал алдагдсаныг өнөөдөр хатуу шүүмжилж байгаа юм. Тэрбээр баг нь 6 дугаар сард ДАШТ-ий хэсгийн шатнаас шалгарч чадаагүйн учир албан тушаалаасаа огцорсон билээ. Улмаар 7 дугаар сард тус улсын парламент Хон Мён Бо-г шалгаруулсан асуудлаар сонсгол хийсэн байна. Хон Мён Бо-гийн хэрэгт холбогдуулан Өмнөд Солонгосын цагдаа нар пүрэв гарагт Өмнөд Солонгосын хөл бөмбөгийн холбооны байранд нэгжлэг хийжээ.

Тус холбооноос бямба гаригт гаргасан мэдэгдэлд дурдахдаа “янз бүрийн асуудлаас үүдэн та бүхний урмыг хугалж, санааг зовоосондоо хүлцэл өчьё” гэсэн байна. Мөн сексийн үйлчилгээ санал болгосон талаар дурдаагүй боловч “иймэрхүү зохисгүй зан үйлдэл өнөө цагт хэрхэвч байж болохгүй” гэжээ.