Швейцарын хөл бөмбөгийн холбоо (ASF) АНУ-ын шигшээ багийн довтлогч Фоларин Балогуны эрхийг түдгэлзүүлсэн шийтгэлийг түр хүчингүй болгож, ДАШТ-ий шөвгийн 16-гийн тоглолтод оролцохыг зөвшөөрсөн Олон улсын хөл бөмбөгийн холбооны (ФИФА) шийдвэрийг шүүмжилжээ. 

Балогуны эрхийг түдгэлзүүлсэн шийдвэрийг түр хүчингүй болгосонтой холбоотойгоор Бельгийн Хааны хөл бөмбөгийн холбооноос гаргасан давж заалдах гомдлыг ФИФА-гийн Сахилгын хороо даваа гаригт хэрэгсэхгүй болгосон байна. Ингэснээр Балогун долоодугаар сарын 7-нд Бельгийн шигшээтэй хийх ДАШТ-ий шөвгийн 16-гийн тоглолтод оролцох эрхтэй болжээ.

"Балогуны хэрэгт гаргасан энэхүү шийдвэр нь ямар нөхцөл байдлаас шалтгаалсан байхаас үл хамааран Швейцарын хөл бөмбөгийн холбоонд огт ойлгомжгүй байна. Өнөөдрийг хүртэл баримталж ирсэн зарчим маш тодорхой байсан. Талбайгаас хөөгдсөн ямар ч тоглогч дараагийн тоглолтыг автоматаар өнждөг. Энэхүү дүрэм хүн бүрд ижил тэгш үйлчилдэг байсан бөгөөд тодорхой, тууштай байдлыг хангаж ирсэн юм. ФИФА-гийн гаргасан шийдвэр нь олон асуултыг дагуулж байна, ялангуяа шүүгчийн шийдвэрийн үнэ цэн, тэр дундаа Видео туслах шүүгчийн систем (VAR) оролцсон үеийн шийдвэрүүдэд эргэлзээ төрүүлж байна. Тэмцээн уралдааныг зохион байгуулах нь дүрэм журам тууштай, нэг мөр хэрэгжих тодорхой зарчимд суурилдаг" хэмээн ASF мэдэгджээ.

Долоодугаар сарын 5-нд ФИФА-гийн Сахилгын хороо Балогуны эрхийг түдгэлзүүлсэн шийтгэлийг түр хүчингүй болгож, түүнийг шөвгийн 16-гийн тоглолтод оролцох боломж олгожээ. Сэтгүүлч Бен Жейкобсын мэдээлснээр, энэ шийдвэрийг ФИФА Жанни Инфантино руу Цагаан ордноос утасдсаны дараа гаргасан байна. АНУ-ын Ерөнхийлөгч Дональд Трамп Инфантино руу утсаар ярьж, хөлбөмбөгчний эрхийг түдгэлзүүлсэн шийдвэрийг дахин хянаж үзэхийг хүссэнээ өөрөө баталжээ.

Балогун Босни ба Херцеговины шигшээтэй хийсэн шөвгийн 32-ын тоглолтод (2:0) хамгаалагч Тарик Мухаремовичийн хөл рүү араас нь хадаастай ултай гутлаараа өшиглөсний улмаас улаан хуудас авч талбайгаас хөөгдсөн юм.

TASS